Kategoria Superiore/ Skënderbeu dhe Partizani fitojnë me vështirësi

Fitore identike të Skënderbeut dhe Partizanit, respektivisht përballë Kastriotit dhe Kamzës në ndeshjet përmbyllëse të javës së 11-të të Superiores. 1-0 ishte rezultatit përfundimtar si në Korçë dhe Tiranë, me diferencën mes kryesuesve që mbetet e pandryshuar, 1 pikë. Kampionët në fuqi të Superiores dhe “Demat” shkëputen ndjeshëm nga Kukësi i vendit të tretë (7 më shumë Skënderbeu dhe 6 Partizani).

Në stadiumin “Skënderbeu” të Korçës sfidën e vendosi goli i Gjergji Muzakës në minutën e 30-të. Pas kombinimit të Bregut me Abazin, ky i fundit krosoi për sulmuesin veteran, që me një goditje të saktë me kokë e dërgoi topin në rrjetë. Pavarësisht humbjes, duhet pranuar që krutanët zhvilluan një ndeshje shumë të mirë, madje në fund të pjesës së parë ishin të pafat teksa tentativat e Domgjonit dhe Ymerajt përfunduan jashtë.

Skënderbeu iu afrua golit të dytë me Oto John në minutën e 85-të, por portieri Kuka mbajti deri në fund në lojë miqtë, që gjithsesi dolën pa pikë nga kjo sfidë.

PARTIZANI

Edhe më e bukur sfida mes Partizanit dhe Kamzës në një “Selman Stërmasi” “të akullt”, ku shpëtimtari i të kuqve rezultoi Bruno Telushi, i cili në momentin e ekzekutimit të një këndoreje në fillim të pjesës së dytë arriti të shtyjë drejt rrjetës topin e kthyer nga Avdyli e të goditur fillimisht po prej tij.

Në pjesën e parë Mala u ndal nga shtylla, ndërsa pak para se të shënohej goli nga Telushi edhe goditja-kros e Ibrahimit u stampua në shtyllë. Me shumë fat Partizani në minutën e 77-të, kur tentativa nga jashtë zonës së Frashërit sërish preku shtyllën, me Hoxhën që mbeti i shtangur.

MEMELLI

Migen Memelli e nisi mjaft mirë aventurën e tij si trajner i Laçit. Skuadra kurbinase u rikthye te fitorja pas dy humbjeve radhazi pasi mposhti Luftëtarin në Gjirokastër me rezultatin e ngushtë 1-0.

Pjesa e parë e kësaj ndeshjeje u mbyll 0-0 dhe me polemika për shkak të një goli të anuluar për Laçin, pasi Gjoni në momentin e shënimit të tij shkaktoi një faull ndaj mbrojtësit të Luftëtarit, Rapa. Laçi e dha goditjen e tij në këtë ndeshje, 11 minuta nga fundi, kur shënoi me Shtubinën për të marrë edhe 3 pikët e sfidës.

TAG:
• partizani
• skenderbeu
• Laçi
• kategoria superiore
• Kamza