Leonard Nikolli, 61 vjeç, është shoqëruar në Komisariatin nr. 3 në Tiranë, pasi gjatë ditës së sotme, ka shkuar në zyrat e IMT Tiranë, duke kërcënuar me jetë drejtuesin e institucionit, Klajdi Meçi.

Kallëzimi në polici është bërë nga ky i fundit, teksa ka pretenduar se Nikolli e ka kërcënuar se do ta vriste. Burime për gazetarin e Report Tv Sokol Dema, bëjnë me dije se Nikolli ka thënë sapo ka hyrë në institucion: Jam i armatosur, ku është drejtori se do e vras?!

Në vijim është shprehur se do ia bënte njëlloj si gjyqtarit Astrit Kalaja. Në vijim 61-vjeçari pritet të arrestohet nga policia.

Sipas Meçit, Nikolli kishte ankesa për një ndërtim që sipas tij duhej të prishej por IMT Tiranë nuk e kishte prishur. Objekti në fjalë ka sigurim padie me vendim gjykate, që e ndalon ndërhyrjen e IMT-së, pavarësisht se mund të ketë pretendime nga palë të tjera të përfshira.

Policia po punon për zbardhjen e plotë të rrethanave të ngjarjes.