Kërcënohet me jetë Nazime
Visha, kallëzon gruan e Fiqiriut

Vetëm pak ditë pasi ka lënë qelitë e burgut të grave në Tiranë, Nazime Visha është kërcënuar me jetë nga e veja e Fiqiri Muçës, Mynyre Muça.

Gazeta “Shqiptarja.com” ka mësuar se Mynyre Muça është kallëzuar në policinë e Tiranës, nga Nazime Visha, pasi kjo e fundit pretendon se është kërcënuar me jetë nga ish-gruaja e Fiqiri Muçës.

Ky i fundit është vrarë me armë zjarri pak vite më parë nga e reja Nazime Visha.

Për këtë vrasje, Nazimeja pretendoi se e kishte kryer në kushtet e vetëmbrojtjes së nevojshme, por pas publikimit të një sërë meszheve telefonike që ajo kishte shkëmbyer me viktimin para krimit, ka rezultuar se e reja e kishte ftuar vetë në takim viktimën, dhe pasi Fiqiriu ka zbrituar nga makina është qëlluar me breshëri automatiku, duke mbetur i vdekur në vend.

Për këtë krim, Nazime Visha është dënuar me 10 vite burg, nga të cilat ka bërë vetëm 4 vjet heqje lirie, pasi u fal me një dekret special nga Presidenti i Republikës, Bujar Nishani.

Pikërisht pas daljes nga burgu dhe mënyrës së lirimit të Nazimes, kanë reaguar shumë ashpër deri në kërcënime për hakmarje familjarët e të ndjerit Fiqiri Muça. Mësohet se pak ditë më parë, ka qënë gruaja e Fiqiriut, Mënyre Muça, ajo që ka kërcënuar me jetë Nazime Vishën.

Nisur nga kjo situatë, kjo e fundit i është drejtuar policisë së Tiranës duke paraqitur një kallëzim penal për veprën penale të “Kanosjes” dhe “Përndjekjes” kundër Mënyre Muçës. Njëherësh, në datën 25 prill 2016, Nazime Visha i është drejtuar dhe Gjykatës së Tiranës, duke kërkuar prej kësaj të fundit një urdhër mbrojtje ndaj Mynyre Muçës, pasi sipas të resë, Muça përbën rrezik për jetën e saj.


                           Mynyre Muça                                                                      Nazime Visha


 Nazime Visha dhe Fiqiri Muça


Nazime Visha del nga burgu dhe pritet nga gjyshja e saj

Redaksia Online
(m.b/shqiptarja.com)