Kryeministri Edi Rama me anë të një reagimi në rrjetet sociale i ka kthyer përgjigjje ironisë së bërë sot në mëngjes nga presidenti Meta, i cili përbri disa pamjeve fantastike nga vendi ynë shkruante 'nuk na mungon asgjë më shumë nga Zvicra përveç referendumeve'.

Në reagimin e tij Rama thotë se askund në botë nuk bëhet referendume për çështjet e reformës zgjedhore, ndërsa shton i bindur se listat do të hapen.

"IM thotë ndryshimi i sistemit,heqja e koalicioneve,hapja e listave bëhen vetëm me referendum!Askund nuk bëhet referendum për këto çështje. Ndërsa këtu as sistemi s'do ndryshojë, as koalicionet s'do ndalohen, po listat do hapen nga Kuvendi i Shqipërisë me ligj, me zakon e me karton!

Sa për modelin lindor, modeli i koalicionit që kemi s'është as perëndimor,as jugor,as verior dhe prandaj nuk gjendet askund në lindje a në perëndirm! Modeli i ri do të jetë gjerman e plotësisht europian, koalicion tamam, me zë, figura e program,jo kosh karavidhesh pa din as iman!"

Por Meta i është përgjigjur përmes zëdhënësit Tedi Blushi. "Pse kaq frikë nga populli? Në Shqipëri kanë ndodhur dy referendume dhe në të dyja herët ka fituar populli. Padyshim edhe referendumin e tretë do ta fitojë populli. Sepse në republikën e Shqipërisë, sovraniteti i përket popullit dhe vetëm atij. Mos kini frikë nga populli" shkruan ai.