Kleoniki Delijorgji kurorëzohet
më e bukura në “Miss Globe”

Konkursi i bukurisë “Miss Globe” ka përfunduar duke shpallur si më të bukurën e tij 16-vjeçaren shqiptare Kleoniki Delijorgji. “Miss Shqipëria” në fuqi, Delijorgji ka marrë nga 17 anëtarë të jurisë, 10 vota pro për të fituar titullin e më të bukurës së Globit.

Shoqëruesja e parë e saj është shpallur Miss Kina, 17 vjeçarja Jinzi Huang dhe shoqëruesja e dytë, Miss Rusia, 21 vjeçarja Inessa Yurinskaya. Në këtë kompeticion garonin 43 bukuroshe nga vende të ndryshme të botës duke i përfaqësuar denjësisht ato.

Spektakli u zhvillua në Pallatin e Sportit në Vlorë dhe erdhi nën prezantimin e bukuroshes Hygerta Sako dhe Kryekomisarit Krenar Ahmetit, të cilët kanë dhuruar një atmosferë mjaft të këndshme nëpërmjet batutave të tyre.

Edicioni i 39-të i “Miss Globe” erdhi nën kujdesin e veçantë të producentit Petri Bozo. Ndërkohë për të dhuruar sa më shumë emocione në këtë event ishin ftuar emra të njohur të muzikës si Aurela Gaçe, katër prej talenteve të “The Voice of Albania 1” si Elis Nova, Gjergj Kaçinari dhe motrat Kumria,këngëtarja Rona Nishliu etj.

Sfilatat e bukurosheve kanë qenë me veshje mbrëmje, me bikini dhe me kostumet popullore të vendeve që përfaqësonin. Gjithashtu në kuadër të 100-vjetorit të Pavarësisë është kënduar kënga “Dua më shumë Shqipërinë” nga Rona Nishliu dhe Ardian Lika.

Gjithashtu pati shumë performanca elegante të kururara nga Olta Ahmetaj, ritmi muzikor i përzgjedhur nga Fabian Basha, dhe shumë elementë që kujtonin festimet e këtij viti jubile për shqiptarët kanë përmbyllur këtë edicion.

Jo rastësisht turi i vajzave, këtë vit, u mendua nga organizatorët ta kapërcente kufirin shtetëror të Shqipërisë. Miss-et u nisën nga Tirana dhe më pas përshkuan qytetet historike dhe turistike shqiptare, duke u ndalur në Ulqin.

Bukuroshet iu drejtuan Kosovës për të ndalur në Prizren ku janë njohur me historinë e këtij qyteti, kanë vizituar muzeun dhe shtëpinë e Lidhjes Shqiptare të Prizrenit, datë e rëndësishme në historinë tonë. Harta e udhëtimit ka vijuar në Mitrovicë, është vizituar kulla e Isa Boletinit, një figurë e njohur në përpjekjet për shpalljen e Pavarësisë, është vizituar qyteti dhe më pas turi është përmbyllur në Strugë.

Kleoniki Delijorgji ka hyrë në historinë e këtij kompeticioni si vajza e dytë shqiptare që fiton titullin ndërkombëtar të bukurisë, duke e kthyer këtë titull në më të veçantë për shkak të 100-vjetorit të Pavarësisë.

(xh.k/shqiptarja.com)