Ekspertin Klodian Gjata ka sqaruar të mërkurën në emisionin “Këndi i ekspertit” në Report TV, në orën 19:00, problematikat rreth administrimit të pallateve. Eksperti Gjata ka sqaruar mënyrën se si zgjidhet administratori i pallateve, çfarë kriteresh duhet të plotësojë një qytetar që të certifikohet si administrator.

Po kështu ai ka sqaruar edhe detyrimet e administratorit si dhe se çfarë mund të bëjnë qytetarët nëse një administrator nuk kryen si duhet punën që i kanë caktuar. Eksperti i është përgjigjur edhe shumë pyetjeve specifike nga qytetarët rreth kësaj problematike.

Cilat janë kriteret që duhet të plotësojnë qytetarët për t’u certifikuar si administrator?
Kriteret që duhet të plotësojnë qytetarët në librin e administratorëve janë: dëshmia e penalitetit, përfundimi i shkollës së mesme, dëshmia nga gjykata, dëshmia nga prokuroria dhe përfundimi i kursit për administrator. Dokumentacioni depozitohet pranë Bashkisë së Tiranës dhe brenda 15 ditëve qytetari merr përgjigjen.

Ku mund t’i gjejnë qytetarët këto informacione?
Këto informacione mund t’i gjejnë në Ëeb-in e Bashkisë së Tiranës. Gjithashtu kemi zyra në Bulevardin “Zog I”, në ish-godinën e gazetës “Zëri i Popullit”, ku mund të marrin edhe informacione më të detajuara.

Bashkia e Tiranës ndërhyn në tarifën e administrimit?
Bashkia e Tiranës nuk ndërhyn në asnjë moment për sa i përket caktimit të tarifës. Është asambleja e bashkëpronarëve ajo e cila ka specifikuar dhe ka përllogaritur kostot e administrimit në buxhetin e saj vjetor. Unë dua të theksoj edhe një herë që qiraxhinjtë janë ata të cilët paguajnë tarifën e administrimit, por nuk kanë të drejtë në vendimmarrje. Ata nuk janë as anëtarë dhe as nuk kanë të drejtë vote, por kanë detyrimin të paguajnë.

Sa e ka rrogën administratori i pallatit?
Është asambleja e bashkëpronarëve ajo që vendos mbi koston e mirëmbajtjes së një pallati. Në këtë kosto përfshihet pagesa e administratorit, paketa minimale e administrimit. Administratori e ka detyrim ligjor të bëjë kalkulimet. Pasi ka marrë vendimin e asamblesë për përllogaritjen e këtyre kostove, ku është edhe zëri i administratorit, administratori i zgjedhur ligjërisht i publikon dhe është transparent ndaj të gjithë qytetarëve duke thënë kostot individuale për secilin zë, pra të pastrimit, të ashensorit, të higjienizimit, detergjentet dhe ndonjë shpenzim ekstra që mund të ketë në momente të caktuara.

Telefonoj nga Yzberishti. Lidhur me administratorët e pallateve. Ne nuk kemi as lulishte, edhe ashensori është me probleme, pastruese nuk e dimë fare se si është vendosur. Ne s’e kemi zgjedhur fare administratorin, por dëgjojmë këtu sikur është zgjedhur dhe nuk e di se kush i vendos këto pagat e këtyre. Ne paguajmë shumë. Ujë s’kemi por e paguajmë, paguajmë lulishte por s’kemi lulishte fare.
Projekti ka startuar nga janari i vitit 2016 dhe ne jemi prezent aktualisht në 2 900 pallate. Unë e siguroj qytetarin që ne do të jemi shumë shpejt pranë pallatit të tij. Për sa i përket kostos së administratorit, ajo ka të bëjë me paketën minimale të administrimit e cila është e miratuar nga ministria e linjës. Nga përllogaritjet që janë bërë dhe nga ajo që ne kemi të prekshme nga procesi, kostoja mujore për një qytetar shkon nga 1 000 deri në 1 500 lekë të reja për pallatet e ndërtuara pas vitit 1993, ndërsa për pallatet e ndërtuara para vitit 1993 kjo kosto sigurisht që është më e ulët sepse në to mungon ashensori, i cili përbën edhe një kosto ekstra.

Ç’është fondi i komunitetit?
Fondi i komunitetit është një program i ri, të cilin Bashkia e Tiranës e ka lançuar gjatë vitit 2017. Fondi i Komunitetit i vjen në ndihmë qytetarëve në lidhje me termoizolimin, në rregullimin e tarracave, të ambienteve të përbashkëta, lulishteve. Kushti kryesor për të marrë pjesë dhe për të qenë pjesë e këtij programi është zgjedhja e asamblesë, e kryesisë, zgjedhja e administratorit të ligjshëm dhe dakordësia që duhet të kenë bashkëpronarët t’i bashkëngjiten këtij projekti sepse 50% të fondit e mbështet Bashkia e Tiranës dhe 50% e këtij fondi vjen nga qytetarët.

Jam një banore në “Don Bosko”, Tiranë. Në pallatin tonë nuk kemi ashensor, nuk kemi as administrator, megjithëse kemi tentuar disa herë ta zgjedhim nuk kemi mundur, nuk kemi rënë dakord. Jetoj më një pallat të ri, “Kulla 7”.
Në rastet kur nuk është zgjedhur një kryesi pranë një pallati, apo kur nuk kemi konstituimin e kësaj kryesie, i lind e drejta Kryetarit të Bashkisë për të caktuar një administrator nga një shoqëri administrimi, deri në momentin kur banorët të zgjedhin një kryesi.

Unë banoj në zonën e Porcelanit. Pallati ka 50 familje, ka ashensor, është edhe administratori i pallatit. Në masën 70-80% e familjeve paguajnë rregullisht 700 lekë në muaj, por absolutisht asnjë lloj shërbimi nuk na ofrohet përveç pastrimit të shkallëve. Ne nuk kemi asnjë lloj informacioni se ku shkojnë lekët. Administratori i merr lekët. Ka një problem që mua më duket më shqetësuesi. Kur ndërpritet energjia ose kur ka defekt ashensori, njerëzit mbeten brenda dhe ne duhet të gjejmë vetë mënyrat se si ta hapim. Ashensori ka dridhje dhe do të rrezikohen edhe kavot e ashensorit. Uroj të mos ndodhë ndonjë e keqe.
A ka pallati juaj një kryesi të zgjedhur? A keni bërë mbledhje? Sepse ne kemi qenë prezent te ju.

Mund të zgjedhësh njerëz sa të duash por e rëndësishme është që ai që merr paratë, duhet të punojë. Ai që është i lidhur direkt me këtë detyrë, nuk e ka këtë impenjim. Ne edhe lyerjen e pallatit e bëjmë vetë, privatisht.
Në lidhje me ashensorin, i cili ka 14 vjet dhe ka probleme, është detyrimi i administratorit të zgjedhur që ta regjistrojë ashensorin pranë organit kompetent dhe është ky person përgjegjës për këtë ashensor. Ashensori minimalisht duhet të kontrollohet një herë në muaj. Lidhur me pakënaqësitë e qytetarit ndaj administratorit, Bashkia e Tiranës ngre një grup inspektimi në raste të tilla dhe verifikon situatën dhe punën që ka kryer ky administrator.

Në rastet kur konstatohen shkelje, Bashkia e Tiranës ka kompetencën që t’i japë vërejtje administratorit, ta pezullojë deri në largimin e tij nga libri i administratorëve. Banorët e pallateve duhet të bëjnë një ankesë me shkrim në zyrën për pritjen e qytetarëve në Bashki dhe drejtoria përkatëse ngre grupin e punës dhe vijon procesin duke bërë verifikimet në terren. E siguroj qytetarin që në momentin që dorëzohet kërkesa me shkrim, nuk do të ketë vonesa, por do të vijmë menjëherë për të bërë verifikimet dhe për të marrë masat e duhura.

Telefonoj nga Tirana. Banoj në Rrugën e Dibrës, në një pallat të ri. Administratori është zgjedhur nga një pjesë e banorëve pa u konsultuar me të gjithë banorët. Pagesa mujore që bëjmë nuk është e njëjtë për çdo muaj, një herë 12 000 lekë të vjetra në muaj, një herë 13 000 lekë, sipas dëshirës së administratorit. Kur kemi probleme për rregullime brenda pallatit nuk na përgjigjet. Nuk dimë se si të veprojmë për të gjetur një zgjidhje.
Administratori i pallatit është zgjedhur sipas kritereve? Keni një kryesi në pallatin tuaj? A është njohur nga Bashkia e Tiranës ky administrator?

Është zgjedhur vetëm nga një pjesë e banorëve të pallatit, jo nga të gjithë. Dhe nuk është i njohur nga Bashkia e Tiranës.
Nisur nga pyetja e qytetarit, do t’i vijmë në ndihmë edhe qytetarëve të tjerë. Administratorin e zgjedh asambleja e bashkëpronarëve, me një shumicë të thjeshtë, 50 + 1, të bashkëpronarëve. Në asnjë rast tjetër kjo marrëveshje midis banorëve dhe administratorit nuk është e vlefshme. Duhet që 50 + 1 e bashkëpronarëve të bien dakord për këtë administrator dhe në këtë mbledhje përcaktohet jo vetëm emri i tij, por edhe tarifa. Tarifa nuk ndryshon nga muaji në muaj. Kjo tarifë përcaktohet me një kontratë 1-vjeçare dhe është fikse. Unë ftoj qytetarët që të lidhin kontratë me administratorët. 

Zotërinë që është administrator aktualisht te ky pallat, unë e ftoj që të vijë pranë zyrave tona, të plotësojë të gjitha kriteret që duhen, në mënyrë që të pajiset me certifikatën si administrator. Ai duhet të plotësojë të gjitha kriteret e regjistrimit dhe ne kemi mundësi më pas, me anën e grupeve të kontrollit, të kontrollojmë punën e tij. Pagesa nuk ndryshon çdo muaj dhe administratori duhet të jetë transparent. Ai duhet të afishojë në një kënd të pallatit shpenzimet e parave, çdo muaj. Fondi që mbetet rezervë, depozitohet në një numër llogarie bankare që hapet në emër të kryesisë dhe përdoret në një moment të caktuar për nevoja të caktuara.

Banoj në Tiranë, në rrugën “Don Bosko”, Kulla 6. Kemi zgjedhur bordin, e kemi zgjedhur vetë administratorin. Ka shumë hallka burokratike nga Bashkia për t’i dhënë licencën që ai të vazhdojë punën. Ne kemi bërë shumë punime në pallatin tonë sepse ka qenë me shumë defekte. Banorët janë shumë të rregullt në pagesa. Kemi ankesë vetëm për Bashkinë që nuk na licencon administratorin.
Personi që administratorët dëshirojnë ta kenë si administrator duhet të plotësojë kriteret e regjistrimit. Unë e garantoj qytetarin që brenda 15 ditëve nga depozitimi i kërkesës dhe plotësimit të saktë të dosjes të personit që dëshiron të bëhet administrator, ne japim përgjigje dhe e pajisim personin me certifikatën përkatëse.

d.c./shqiptarja.com