Kocijancic: Inkurajojmë Preshevën
e Beogradin të vijojnë dialogun

BRUKSEL - "Ne nga Brukseli inkurajojmë përfaqësuesit e shqiptarëve nga Presheva për të vazhduar dialogun me Beogradin, gjerësisht me autoritetet e qeverisë serbe në zgjidhjen e problemeve me të cilat ballafaqohet Lugina”, ka deklaruar për agjencinë  e lajmeve “Presheva Jonë” Maja Kocijancic, zëdhënëse e Përfaqësueses së Lartë të Bashkimit Evropian për Politikë të Jashtme dhe Siguri, baroneshës Catherine Ashton, e pyetur rreth tërheqjes së palës shqiptare nga Presheva nga dialogu me Beogradin.

Kocijancic ka shtuar se “ne jemi duke ndjekur nga afër zhvillimet dhe situatën në Luginën e Preshevës nëpërmjet delegacionit të Bashkimit Evropian dhe në bashkëpunim të ngushtë me Misionin e OSBE-së në Serbi, i cili është përherë në monitorim dhe me partnerë të tjerë ndërkombëtarë”.

Përfaqësues politikë të shqiptarëve të Luginës së Preshevës pardje, pikërisht më 28 Nëntor i kanë dërguar një letër kryeministrit të Serbisë, Ivica Daçiç dhe zëvendësit të tij Aleksandar Vuçiç. Në letër liderët e Preshvës kanë konsideruar se është i pakuptimtë vazhdimi i dialogut të filluar me Beogradin, sepse qeveria serbe nuk është e interesuar për zgjidhjen e krizës në Luginë, sepse vazhdimisht ka injoruar kërkesat e shqiptarëve nga Lugina e Preshevës, siç u dëshmua në seancën e fundit të Kuvendit të Serbisë.

Pas kësaj tërheqje të liderëve nga Presheva nga dialogu me Beogradit nga burimet diplomatike në Bruksel agjencia e lajmeve “Presheva jonë” ka mësuar se BE ka bërë presion në qeverinë serbe për të hequr dorë nga politikat diskriminuese ndaj populltatës shumicë në jugun e Serbisë, përkatësisht në Medvegjë, Bujanoc dhe Preshevë dhe t’i qasen me seriozitet bisedimeve me Preshevën për zgjidhjen e problemeve të shqiptarëve entikë në ato treva.

Redaksia Online
(mag/shqiptarja.com)

TAG:
• OSBE