Kodi i Sjelljes, Shalsi: Disiplinon
Parlamentarët, Paloka: Qesharak

TIRANE- Kodi i Sjelljes i hartuar nga OSBE dhe i depozituar në Kuvendin e Shqipërisë do të sintetizojë ato rregulla dhe ligje për parlamentaret shqiptarë në një dokument të vetëm. Në një intervistë për “A1 Report” deputeti socialist Eduard Shalsi, njëherësh edhe kryetari i Komisionit të Veprimtarisë Prodhuese, tha se Kodi i Sjelljes vjen për të gjykuar jetën e secilit parlamentar e për të disiplinuar ata që hera herës shkaktojnë konflikte.

“Nuk është një dokument që do të kontrollojë parlamentarët por është një normë është një standard mbi të cilin do të gjykohet jeta e secilit prej parlamentare”, tha deputeti Shalsi.
 
Por ky Kod duket se nuk është pritur aq mirë nga Demokratët, madje kreu i Grupit Demokrat Edi Paloka e cilëson qesharak këtë dokument, ndërsa shton se ata nuk do ta votojnë.

“Parlamenti shqiptar nuk ka këtë problem, nuk është problemi i kodit të etikës, duhet të mos shahen deputetët me njëri tjetrin, mos shahen por mund të rrihen, këto kushte ky kodi i etikës do duket qesharak, duket një tallje. Ne nuk mund të bëhemi pjesë e gjërave që janë krejtësisht fasadë, fallco për këtë parlament. Këtu bëhet fjalë për mbijetesën e opozitës”, u shpreh deputeti Paloka.
 
Por ky cilësim i bërë nga kolegu tij për Shalsin konsiderohet i pavend.

“Nuk dua ta besoj që epiteti që i paska vënë këtij kodi kolegu im i PD të jetë i vërtet kjo do të thotë që nuk je i përgatitur për të qenë pjesë e një parlamenti ku normat etike jo vetëm duhen respektuar por duhen bërë gurë themeli për sjelljen e çdo parlamentari”, reagoi deputeti Shalsi.
 
Deputetëve do t’u ndalohet përdorimi i telefonisë celulare në ambientet e sallës së Parlamentit. Ata duhet të jenë të veshur me kostume, dhe në rast se do t’iu japin dhurata për shkak të detyrës, duhet t’i refuzojnë, ose do të përdoren për qëllime të Kuvendit. Për fyerje dhe sharje mes ligjvënëseve, Kodi i referohet rregullores ku parashikohet përjashtim deri në 10 ditë dhe sanksione financiare.
 
Redaksia Online
(e.s/shqiptarja.com)

TAG:
• OSBE