Kodi Zgjedhor, 4 propozimet e
Metës, Rama: Diskutim të gjerë

Kryeministri Edi Rama ka komentuar nga Nishi, Serbi, ku po merr pjesë në punimet e Forumit Ekonomik Shqipëri-Serbi, deklaratat e kryetarit të Kuvendit, Ilir Meta në lidhje me 4 propozimet, mes tyre reduktimi i numrit të deputetëve në Kuvendin e Shqipërisë dhe listat e hapura në zgjedhje.
 
Duke iu përgjigjur interesit të gazetarëve, Rama është shprehur se kjo çështje kërkon diskutim të gjerë.
 
"Personalisht jam kundër listave të hapura, por kjo çështje kërkon një diskutim të gjerë.
 
​Unë jam që të zbatohen rekomandimet e OSBE-ODHIR" është shprehur Rama.
 
Rama është pyetur edhe për kthimin e dekretit për ligjin e Mbetjeve nga Presidenti Nishani. Kreu i qeverisë theksoi se nuk priste të kundërtën nga Nishani.
 
"Nuk prisja të ndodhte ndryshe", theksoi më tej, Rama.

Zgjedhjet parlamentare/ Çfarë janë listat e hapura
Sistemi proporcional i zgjedhjeve me lista të hapura, u jep mundësi qytetarëve që përveç votës për partitë politike të votojnë edhe për kandidatët për deputetë duke zgjedhur drejtpërdrejt përfaqësuesin e tyre në Kuvend.
 
Aktualisht zgjedhja e përfaqësuesve të popullit është me lista të mbyllura, ku partitë përcaktojnë renditjen e kandidatëve për deputetë në çdo qark. 

Në këtë mënyrë, votat shkojnë për subjektin politik dhe deputetët zgjidhen në bazë të renditjes së paracaktuar nga subjektet politike dhe kryetarët e partive.

Listat e mbyllura i japin më tepër pushtet kryetarëve të partive në përcaktimin e listës së deputetëve, ndërsa me listat e hapura veç garës së subjekteve përballja është e drejtpërdrejtë edhe mes kandidatëve.

Redaksia Online
l.q/Shqiptarja.com

TAG:
• OSBE