Koka: Janari i 2016, fillimi i moratoriumit mbi pyjet, do të zgjasë deri në vitin 2026

/ ATSH/ -  Kreu i ministrisë së Mjedisit, Lefter Koka, në një dalje publike te merkuren tha se në gjithë vendin llogariten 300 mijë familje që përdorin lëndë drusore për ngrohje. Këta qytetarë do të mund ta blejnë këtë produkt vetëm përmes pushteti vendor, i cili do të jetë përgjegjës për administrimin e pyjeve, tha ai.
"Në rastin në fjalë do të kërkohet që të jetë bashkia ajo që do të evidentojë ekzaktësisht cilat janë zonat që kanë nevojë për rigjenerim. Pikërisht këtë lëndë drusore ta përdorë për furnizimin e këtyre banorëve, që në një rast apo tjetrin do të jenë blerës të ligjshëm të kësaj lënde drusore dhe me kosto shumë të ulët",  tha ministri Koka.
Kreu i ministrise se Mjedisit tha se do të stimulohet importi i lëndës drusore përmes uljes së taksave, në mënyrë që qytetarët por edhe subjektet të plotësojnë nevojat e tyre. Nga ana tjetër, janë me qindra subjekte minerare të cilat kanë shfrytëzuar pyjet, duke shkaktuar dëm ekonomik dhe mjedisor.
"Janë rreth 400 miniera apo hidrocentrale që nuk kanë lidhur marrëveshje me ministrinë e Mjedisit, qe janë pajisur me leje shfrytëzimi vite më parë. Nga ana tjetër, nuk kanë shlyer detyrimin ligjor për të rimbjellë atë sipërfaqe që kanë dëmtuar. Kompanitë që kemi kontaktuar janë dakord të vijnë e të rilidhin kontratë në ministrinë e Mjedisit dhe të aprovohet në Këshillin e Ministrave për të mbjellë sipërfaqet e dëmtuara", tha Koka.
Sipas tij, pushteti vendor do të administrojë të gjithë sipërfaqet e pyjeve dhe do përcaktojë zonat ku mund të ndërhyhet për prerje.