1 ton kokainë “CR 7” në Spanjë, zbulohen emrat e dy 'boss'-ëve shqiptarë të arrestuar

Janë zbuluar emrat e dy shqiptarëve të arrestuar dje nga policia spanjolle në bashkëpunim me DEA-n amerikane duke sekuestruar 1 ton kokainë dhe 1.5 mln euro.

Sipas medieve spanjolle bëhet fjalë për Julian Deblinin dhe Dritan Gradicën.

Policia ka arrestuar 5 persona, 2 shqiptarë, 2 spanjollë dhe një kolumbian.

Lënda narkotike transportohej nga Kolumbia në drejtim të Spanjës me avionë të vegjël me fluturime çarter. Transporti bëhej i kamufluar sikur ishin një kompani që ofronte transport. Droga ishte e ndarë në 790 pako me kokainë dhe transportohej në valixhe të mëdha të zeza. Ajo ishte markuar me logon ‘CR7’, një shkurtim që përdoret për lojtarin e famshëm të Realit të Madridit, Cristiano Ronaldo.

"Koka" shqiptare e grupit dërgonte paratë në Kolumbi

Sikurse është shpjeguar në faqen zyrtare të Prokurorit spanjoll, zbulimi u bë falë “teknikave të ndryshme të policisë gjyqësore, që kanë pikasur secilin prej anëtarëve përkatës, lëvizjet e tyre dhe rolin që kishin”.

"Në këtë mënyrë u bë e qartë se kishte një grup përgjegjës për grumbullimin e drogës në Kolumbi dhe fshehjen e saj në fluturime charter për në Spanjë”.

Pasi mbërrinte në Evropë, kokaina “merrej në dorëzim nga një rrjet që ishte përgjegjës për shpërndarjen e saj, ndërkohë që kreu i grupit, me shtetësi shqiptare, koordinonte grumbullimin e parave dhe dërgimin e tyre drejt Kolumbisë”.

Sipas njoftimit zyrtar të Prokurorit spanjoll, u zbulua edhe se kishte një grup kriminal “me disa precedentë penalë” që ishin pjesë e strukturës kriminale; ata kishin në dispozicion “kontakte të shumta në trafikun e drogës” në Kolumbi, dhe ndër të tjera garantonin siguri private nëpër lokale të Ishujve Baleare.

Nga të arrestuarit, në Kolumbi u prangos Lelio Nevardo Ávila Santana, ndërsa në Spanjë, në autostradën për në Barcelonë u arrestuan shqiptarët Julian Deblini dhe Dritan Gradica, si dhe spanjollët Rubén Paz Ciprián Muñoz dhe Rubén del Castillo de la Torre.

Zyra e Prokurorit të Përgjithshëm spanjoll, në bashkëpunim me DEA-n dhe autoritetet evropiane, do të vijojë hetimet "për të lokalizuar anëtarët e tjerë të dyshuar të organizatës së narkotrafikut”.

Me charter nga Kolumbia drejt Spanjës, kokaina me etiketa "CR 7"

Sipas autoritete spanjolle, hetimi filloi nëntorin e kaluar, grupi kishte bazën në Shqipëri. Pas hetimeve rezultoi se kokaina në Spanjë futej nga banda shqiptare me fluturime çarter nga Kolumbia më pas shpërndahej në të gjithë Europën.

Zëdhënësja e policisë spanjolle Laura Garavoa e kontaktuar nga Report Tv konfirmon arrestimin e dy shqiptarëve, ndërsa shprehet se njëri prej tyre ishte koka e bandës së kokainës.

"Grupi i kokainës drejtohej nga 2 shqiptarë, u arrestuan të dy në Madrid" - tha ajo.


Dy shqiptarët e arrestuar

Përveç drogës dhe 1.5 mln eurove cash që do të bëheshin për pagesën e transportit janë sekuestruar edhe pesë makina luksoze, karta telefonike dhe pajisje të tjerë që përdorte banda shqiptare.

Kjo nuk është herë e parë që shqiptarët janë të përfshirë në trafik kokaine nga Amerika Latine. Në fund të muajit shkurt nga Kolumbia në Shqipëri u transportuan përmes kontenierëve 613 kg kokainë. Në Kolumbi janë bërë atentate ndaj disa shqiptarëve, tre prej të cilëve kanë mbetur të vdekur, i fundit u vra në fillim të muajit prill, Adriatik Lagjaj.

Në media u fol se ai është vrarë nga kartelet e drogës për shkak të prishjeve të pazareve të drogës dhe për shkak të sasisë së madhe të kokainës së kapur në vendin tonë, por kjo pistë është ende e pakonfirmuar. Kjo vrasje erdhi në një kohë kur në Durrës u kap 613 kg kokainë e ardhur nga Kolumbia me kontenierë të kompanisë së banave “Arbri Garden”.

/b.ha./Shqiptarja.com

TAG:
• kokaina ne spanje
• Cr 7