Komisioni i Ligjeve miratoi në seancën e sotme paketën e ndërhyrjeve në Kodin Penal të prezantuar nga ministri i Drejtësisë Besfort Lamallari. Kjo paketë do të kalojë për miratim dhe në seancë plenare dhe kërkon 84 vota.

Korrigjimet në Kodin Penal ekzistues parashikojnë ashpërsimin e veprave penale me natyrë seksuale në raport me fëmijët, trafikimin e qenieve njerëzore apo shfrytëzimin e njeriut.

Ashpërsime do të ketë dhe për zaptimin e paligjshëm të tokës dhe ndërtimet pa leje, sidomos për zonat e mbrojtura. Rishikime do të ketë dhe për dënimin e nëpunësve publikë, zjarrvënësit kur qëllimi është tjetërsimi i tokës.

Dënime të ashpra do të ketë dhe për parkimin e dyfishtë. Ndërkohë siç është thënë dhe më parë, gazetarët do të përjashtohen nga përgjegjësia penale për shpifje si dhe do të forcohet dënimi i atyre që u kërcënojnë sigurinë.

“Ashpërsojnë veprat penale me natyrë seksuale në raport me fëmijët. Trafikimi i qenieve njerëzore, përjashtohet cdo justifikim me pëlqimin e viktimave. Zero tolerancë për shfrytëzimin e njeriut nga njeriu. Ashpërsohen ndeshëm dënimet për zënien e paligjshme të tokës dhe ndërtimet pa leje, sidomos në zonat e mbrojtura.

Dënimet më të ashpra kur këto bëhen nga nëpunës publikë. Ashpërsohet dënimi për zjarrvënëset kur ka pasoja apo bëhet me qëllim tjetërsimin e tokës. Dënohet parkimi i dyfishtë më shumë kur pengon mjetet emergjente. Mbrojtja e gazetarëve, përjashtohet përgjegjësia penale për shpifje kur bëhet në mirëbesim, dhe forcohet dënimi i atyre që kërcënojnë sigurinë e tyre.”, tha ndër të tjera Lamallari.

Ministri i Drejtësisë thekson se kjo nismë vjen në kuadër të përmirësimit të legjislacionit, si dhe përshtatjes dhe përmbushjes së kërkesave të BE-së në kuadër të procesit të integrimit.

Lajmi në përditësim...

Rendit zhvillimet sipas orarit:
Ora 14:15
Manja ironi me opozitën: Ndajeni si do i flisni njëri-tjetrit me datë 24 në protestë, se Berisha nuk dëgjon mirë nga veshët (VIDEO)

Deputeti i Partisë së Lirisë, Tedi Blushi në Komisionin e Ligjeve, ka dalë kundër propozimeve të ministrisë së Drejtësisë për ndryshimet në Kodin Penal ekzistues. Blushi tha se nuk është normale të dënosh me burg qytetarët për parkimin e dyfishtë dhe të mos i dorëzosh drejtësisë zv.kryeministren Belinda Balluku.

Blushi: Sot ky komision i ka dedikuar një ditë të posaçme ndërtimit të infrastrukturës ligjore për ta instaluar me ligj atë që opozita ka denoncuar si narkoshtet. E nisët me drogën, tani po vijoni me masa represive për të dënuar qytetarë për parkimin dysh. Më vjen keq që këtë nisëm e ka propozuar drejtori i Policisë së Shtetit dhe i jepka urdhra qeverisë. Të dënosh shqiptarët për parkimin dysh dhe të mos i dorëzosh qeverisë zv,kryeministren ju qofshi.

Ndërkohë drejtuesi i Komisionit të Ligjeve, Ulsi Manja, i ka ndërprerë fjalën duke i kërkuar të mos bëjë politikë në komision pune. Ndër të tjera, Manja e ironizoi dhe për protestën që opozita do të zhvillojë më datë 24 janar.

Manja: Ky është komision pune. Bëhet dhe politikë, por në funksion të agjendës që ka komisioni. Keni dhe selinë ku mund të mbani qëndrime. Të dëgjova dhe fakti që ju sillni zërin dhe shqetësimin e opozitës, unë uroj që me datë 24 t’i zgjidhni këto probleme. Vetëm nëse do të ndali sesi do t’i flisni njëri-tjetrit në vesh tek foltorja se kam përshtypjen se ai i madhi i opozitës nuk dëgjon mirë nga të dy veshët. Ma beso mua këtë.

K.B/Shqiptarja.com