Konstituimi i Kuvendit, koalicioni
opozitar: Tani ne kemi drejtimin!

PRISHTINE - Koalicioni parlamentar LDK-AAK-NISMA dhe Vetëvendosje pak pas përfundimit të seancës constitutive të Parlamentit të Kosovës kanë dalë në një deklaratë të përbashkët.

Në këtë prononcim për mediat, pas rrëzimit të kanditaturës së PDK-së, kjo aleancë quan legjitime marrjen e frerëve nga ana e saj të zgjidhjes së situatës për të konstituuar Kuvendin e vendit.

"Koalicioni i shumicës parlamentare konsideron se, duke u bazuar në pikën 127 të Aktgjykimit të Gjykatës Kushtetuese për rastin Nr. KO 119/14, të 26 gushtit 2014, e ka të drejtën, mundësinë dhe zgjidhjen për të konstituuar Kuvendin e Republikës së Kosovës dhe pastaj për të vijuar me formimin e Qeverisë së re." thuhet në komunikatën për mediat

Më pshtë deklarata e plotë për shtyp e koalicionit parlamentar LDK-AAK-NISMA dhe Vetëvendosje.
“Koalicioni LDK-AAK-Nisma për Kosovën dhe Lëvizja Vetëvendosje!, pas Seancës së sotme konstituive, konstatojnë dështimin e PDK-së për të zgjedhur Kryetarin dhe për të konstituuar Kuvendin në Legjislaturën V.

Plot 100 ditë që prej datës së mbajtjes së Zgjedhjeve të përgjithshme ishin të pamjaftueshme për PDK-në që të krijojë shumicën në Kuvend. Sot, shumica absolute, pra 61 deputetë, ishin kundër propozimit të PDK-së, kandidati i të cilës mori vetëm 44 vota.

Koalicioni i shumicës parlamentare konstaton se ndërprerja e Seancës nga kryesuesja, deputetja Brovina, pa e respektuar të drejtën e deputetëve të koalicionit të shumicës për fjalë, ishte jokorrekte.

Koalicioni i shumicës parlamentare konsideron se, duke u bazuar në pikën 127 të Aktgjykimit të Gjykatës Kushtetuese për rastin Nr. KO 119/14, të 26 gushtit 2014, e ka të drejtën, mundësinë dhe zgjidhjen për të konstituuar Kuvendin e Republikës së Kosovës dhe pastaj për të vijuar me formimin e Qeverisë së re.”