KORE E VERIUT - Pavarësisht tensioneve në rritje në gadishullin Korean, turistët vendas dhe të huaj erdhën në kufirin ndërkorean në krahun e Koresë së Veriut.

Qindra turistë vizituan pikën e përbashkët e të dy Koreve në afërsi të zonës së demilitarizuar ku edhe disa prej tyre ishin të shqetësuar.

Ne jemi shumë të frikësuar në lidhje me kërcënimet e Penianit se do të sulmojë me raketa bërthamore tha një turist japonez.

Ndërsa një turist korean i lindur në Amerikë tha se ky është vetëm një kërcënim dhe nuk mendonte se një luftë do të shpërthente pasi do të kishte pasoja të mëdha ekonomike dhe njerëzore.

Ditët e fundit kërcënimet e Koresë së Veriut janë përshkallëzuar cdo ditë duke thënë se në objektivet e tyre janë SHBA-ja dhe Koreja e Jugut dhe se do t’i godasë me raketa bërthamore.

Ndërkohë fqinji jugor tha se Peniani ka vendosur në bregun lindor të saj dy raketa me rreze mesatare e cila shihet si pjesë e stërvitjes ushtarake nga ana e saj.

Kompleksi industrial Kaesong i cili është hapur në vitin 2004 është mjaft i rëndësishëm për të dy Koretë pasi ofron çdo vit rreth 2 miliardë dollarë në tregti.

(ad.ti/l.ç/shqiptarja.com)