Kosovë, qeveria prioritete të qarta
të politikës së Jashtme në vitin 2014

PRISHTINË - Kosova ka prioritete të qarta të politikës së jashtme në vitin e ri 2014, thekson MPJ kosovare, pas përfundimit të punimeve të Konferencës së II-të të Ambasadorëve të Republikës së Kosovës, e cila u zhvillua në 27 dhe 28 dhjetor në Prishtinë, me temën “Politika e jashtme dhe multilateralizmi: Forcimi i rolit të Republikës së Kosovës në marrëdhëniet ndërkombëtare”.
 
Gjatë dy ditëve, u trajtuan çështjet kryesore sa i përket politikës së Jashtme të Kosovës, temat që lidhen me punën e misioneve diplomatike të Kosovës, prioritetet, objektivat, sfidat si dhe perspektiva e zhvillimit të mëtejshëm të shërbimit diplomatik të Kosovës.
 
Në fund të punimeve u hartuan edhe konkluzionet e Përgjithshme të Konferencës së Dytë të Ambasadorëve, dokument ky që do të shërbejë për t’i adresuar sfidat dhe prioritetet e politikës së Jashtme të Kosovës në një periudhë afatshkurtër dhe afatgjatë.
 
Dokumenti përbëhet nga tre pjesë kryesore, ku fillimisht janë listuar arritjet e deritanishme, gjendja faktike e misioneve diplomatike të Kosovës dhe pozicioni i vendit tonë në raportet bilaterale dhe multilaterale me rajonin, Evropën dhe botën.
 
Në pjesën e dytë dokumenti reflekton arritjet dhe evidenton punët që duhet të ndërmerren në raport me integrimet euro-atlantike, veçmas me procesin e MSA-së dhe liberalizimin e vizave.
 
Ndërsa, në pjesën e tretë dhe atë më të rëndësishme, dokumenti përshkruan prioritetet dhe aktivitetet në politikën e Jashtme të Kosovës e përqendruar kryesisht në aspektin multilateral sikurse anëtarësimi në organizata ndërkombëtare, fuqizimin e imazhit të Kosovës në botë dhe rritjen e ndërveprimit ndërmjet aktorëve qeveritar për ta forcuar edhe më shumë pozicionin e Kosovës jashtë. 
 
Ministri i Jashtëm, Enver Hoxhaj, falënderoi ambasadorët dhe konsujt për angazhimin e tyre shumë konstruktiv gjatë dy ditëve, si dhe presidenten, kryeministrin dhe ministrat e linjave përkatëse për prezantimet e tyre.
 
Përgjatë dy ditëve, para diplomatëve kosovarë folen presidentja Atifete Jahjaga, kryeministri Hashim Thaçi dhe ministri i Punëve të Jashtme, Enver Hoxhaj, të cilët edhe kanë hapur të premten punimet e Konferencës.
 
Redaksia online
(ac/shqiptarja.com)