Kosovë/ Mbyllja e 5 komunave në veri, serbët në protestë! BE: Dështimi i palëve për të ulur tensionet do ketë pasoja

Rreth 300 serbë protestuan në Veri të Kosovës për mbylljen e 5 komunave paralele të ngritura nga Serbia. Sipas mediave kosovare, protestuesit janë pjesë e administratës së këtyre institucioneve, të cilat operonin paralelisht me komunat e shtetit të Kosovës.

Zëdhënësi i Bashkimit Europian, Peter Stano, tha se mbyllja e komunave paralele në veri të Kosovës, vlerësohet nga blloku si veprim i njëanshëm dhe i pakoordinuar, i cili provokon rritje të tensioneve mes Beogradit dhe Prishtinës.

“Ka çështje më të vjetra në tryezë që duhen shqyrtuar. Ne e konsiderojmë këtë shumë të padobishëm dhe hap tjetër të njëanshëm e të pakoordinuar që ka kapacitet të rrisë tensionet dhe të çojë në përshkallëzim të mëtejshëm. Dështimi i palëve për të ulur tensionet do të ketë pasoja.”

LEXO EDHE:
'Serbia ka provokuar sërish', Albin Kurti publikon fotot: Ka lëvizur trupat 50 metra afër vijës kufitare

Për më tepër, Stano paralajmëroi një takim mes palëve, në nivel kryenegociatorësh, duke mos dhënë një datë konkrete.

“Takimet i paralajmërojmë kur të jetë e përshtatshme. Takimet në nivel të kryenegociatorëve nuk i paralajmërojmë zakonisht për media. Por, pa dyshim qëllimi ynë është që sa më parë të kemi takim në nivel kryenegociatorësh sepse ka një varg çështjesh për të diskutuar.”

Më herët, i dërguari i BE për dialogun Kosovë-Serbi, Mirosllav Lajçak, paralajmëroi një vizitë në Prishtinë për të përgatitur raundin e ri të dialogut në nivel kryenegociatorësh.

SI.E./E.B/Shqiptarja.com

TAG:
• mitrovica e veriut
• BE
• serbi
• kosove
• Dialogu Kosovë Serbi