Kosovë, misioni i OSBE-së nis fushatën kundër dhunës në familje

/ATSH/- Misioni i OSBE-së në Kosovë organizon sot në Prishtinë një konferencë për shtyp me të cilën do të nisë një fushatë informuese kundër dhunës në familje.
Fushata e titulluar "Burrat e vërtetë kurrë nuk i rrahin gratë" ka si personazhe dy profesionistë të sporteve luftarake: boksierin Armend Xhoxhaj dhe kik-boksierin Marko Bozovic. Fushata përmban spote televizive dhe posterë në gjuhën shqipe e serbe dhe do të zgjasë katër javë, duke përfshirë edhe 16 Ditët e Aktivizmit kundër Dhunës ndaj Grave.

Fushata ka për qëllim të ndihmojë parandalimin e dhunës në familje dhe nxit publikun dhe viktimat t'i raportojnë rastet te mbrojtësit e viktimave.
Shefi i Zyrës Rajonale të OSBE-së në Prishtinë, Neil Tobin, menaxheri i Zyrës për Mbrojtje dhe Ndihmë Viktimave, Basri Kastrati dhe Udhëheqësja e Njësisë kundër Dhunës në Familje në Policinë e Kosovës, Tahire Haxholli, do të flasin në këtë ngjarje.

Në Kosvë, me rastin e hapjes së Fushatës së 16 Ditëve të Aktivizimit, Ditës Ndërkombëtare për Eliminimin e Dhunës ndaj Gruas, Agjencia për Barazi Gjinore në kuadër të Zyrës së Kryeministrit publikoi dje Komentarin e Ligjit për Mbrojtjen nga Dhuna në Familje. "Fushata e filluar në 25 nëntor përfundon me 10 dhjetor (Dita Ndërkombëtare e të Drejtave të Njeriut) duke lidhur simbolikisht këto dy ditë në përforcim të mesazhit se dhuna ndaj grave është shkelje e të drejtave të njeriut", u tha me këtë rast.

Presidentja e Republikës së Kosovës, Atifete Jahjaga ka bërë dje një deklaratë me rastin e shënimit të Ditës Ndërkombëtare për eliminimin e dhunës ndaj grave.
"Shpreh mbështetjen time të pakursyer në këto 16 ditët e aktivizmit kundër dhunës gjinore, duke i thënë NDAL dhunës ndaj gruas dhe duke i bërë thirrje të gjithë shoqërisë që përpjekjet për t'i dhënë fund dhunës ndaj gruas t'i bëjnë pjesë të çdo dite të tyre", theksonte ajo.

TAG:
• OSBE