- Presidentja Jahajga viziton komunën e Podujevës, takohet me qytetarët-
PRISHTINË, 11 Shkurt /ATSH-B.Jashari/.-Presidentja e Republikës së Kosovës, Atifete Jahjaga vizitoi sot komunën e Podujevës, në kuadër të vizitave nëpër komunat e Kosovës dhe takimeve me qytetarë, me qëllim të parandalimit të migrimit ilegal të qytetarëve dhe përcjelljes së mesazhit se rruga e ikjes nga vendi nuk është zgjidhje e asnjë problemi.
Fillimisht Presidentja Jahjaga është pritur në takim nga kryetari i komunës, Agim Veliu, i cili e njoftoi Presidenten me gjendjen e përgjithshme në komunën e Podujevës, e cila është e prekur në masë të madhe nga migrimi ilegal i qytetarëve.
Veliu theksoi se javën e fundit vërehet një ulje e fluksit të largimit të qytetarëve, që vërehet edhe nga rënia e dukshme e numrit të kërkesave për dokumente që u shërbejnë atyre për të migruar ilegalisht. Ai gjithashtu theksoi se po shënohen edhe raste të kthimit të qytetarëve, të cilët pasi kanë marrë rrugën e migrimit, janë kthyer sërish në familjet e tyre.
Pas takimit me kryetarin e komunës, Presidentja Jahjaga, e shoqëruar nga kryetari i komunës, takoi qytetarë të shumtë në qytet. Ajo i dëgjoi hallet dhe problemet e tyre, të të gjitha natyrave, dhe premtoi se institucionet e vendit, si ato në nivel qendror, ashtu edhe ato në nivel lokal, do të ndërmarrin të gjitha masat që gjendja e tanishme të ndryshojë në të mirë të zhvillimit dhe mirëqenies së qytetarëve.
Në të gjitha takimet me qytetarët, Presidentja Jahjaga u tha atyre se rruga e ikjes, rruga e largimit nga vendi nuk është zgjidhje e problemeve. Ajo tha se i kupton problemet e qytetarëve, por theksoi se rruga e shtetndërtimit të vendit nuk është një rrugë e lehtë, është një rrugë shumë e vështirë, që kërkon angazhim të të gjitha institucioneve dhe të gjithë qytetarëve.
Në një deklaratë të bërë pas takimeve, Presidentja Jahjaga theksoi se kishte shkuar në komunën e Podujevës për të dëgjuar hallet dhe problemet e qytetarëve, për të dëgjuar arsyet e ikjes së qytetarëve, që po ndodhin kohët e fundit.
"Rruga e ikjes nuk është një rrugë e lehtë, është e pagarantuar, e pasigurt, sidomos tani që po i shohim deklarimet e vendeve të Bashkimit Evropian, të cilët do t'i kthejnë qytetarët tanë. Gjatë bashkëbisedimit me qytetarët e Podujevës, unë u thashë atyre që të bëjnë apel te të gjithë të afërmit e tyre që të mos e ikin nga Kosova, të mos bien pre e grupeve kriminale, sepse e ardhmja e tyre është në Kosovë, që së bashku me institucionet e vendit, me kontributin e gjithsecilit qytetar të vendit tonë, të vazhdojmë me procesin e shtetndërtimit të vendit tonë dhe së bashku të ecim drejt proceseve integruese", u shpreh Jahjaga.
Presidentja e Republikës së Kosovës, Atifete Jahjaga, viziton sot edhe komunën e Gjilan, pas vizitave javën e kaluar në edhe dy nga komunat më të prekura nga migrimi ilegal i javëve të fundit Vushtrri dhe Ferizaj me mesazhin se ikja nga Kosova nuk është zgjidhje.
Vizitat pasojnë Rezolutën e Kuvendit të Kosovës për pengimin e migrimit ilegal të qytetarëve të Kosovës, të miratuar në 5 shkurt, në të cilën ditë edhe Presidentja dhe Kryeminsitri së bashku me bartësit e institucioneve përgjegjëse të Kosovës, biseduan për mënyrat e zgjidhjes së çështjes së migrimit ilegal. Po atë ditë, Presidentja Atifete Jahjaga dhe kryeministri Isa Mustafa, me ftesë të tyre, gjatë ditës kanë takuar edhe ambasadorët e vendeve anëtare të BE-së për të biseduar për bashkëpunimin në çështjen e migrimit ilegal të qytetarëve të Kosovës.Në mbledhjen e djeshme, Komisioni parlamentar për Integrime Evropiane, shprehu shqetësimin lidhur me çështjen e migrimit ilegal të qytetarëve të Kosovës. Gjatë diskutimit u theksua se Komisioni do të ftojë në vazhdimësi për raportim ministrat përkatës lidhur me masat konkrete, që janë ndërmarrë për parandalimin e migrimit ilegal./k.s/