Kremlini deklaroi këtë të premte se Bashkimi Evropian, kur të vendosë për anëtarësimin e Ukrainës në Union, duhet të marrë në konsideratë përfshirjen e dyshuar të Ukrainës në shpërthimet e gazsjellësit Nord Stream.

Deklarata u bë nga zëdhënësi i Kremlinit, Dmitry Peskov, pasi Prokuroria Federale e Gjermanisë ngriti akuza ndaj një ish-oficeri të ushtrisë ukrainase në lidhje me shpërthimet e ndodhura në shtator të vitit 2022.

Sipas autoriteteve gjermane, ish- oficeri akuzohet për bashkëpunim në kryerjen e sulmit dhe për veprim në emër të entiteteve shtetërore ukrainase.

Duke komentuar këtë zhvillim, Peskov e cilësoi ngjarjen si “një akt terrorist kundër infrastrukturës kritike të Bashkimit Evropian”.

“Ky është një fakt shumë i rëndësishëm dhe të gjitha vendet e BE-së duhet ta marrin parasysh kur diskutojnë perspektivën e pranimit të Ukrainës në Bashkimin Evropian dhe thellimin e marrëdhënieve me të”, tha Peskov.

Shpërthimet e shtatorit 2022 dëmtuan tubacionet e gazsjellësit Nord Stream 1, një nga rrugët kryesore të eksportit të gazit rus drejt Evropës, si edhe një degë të Nord Stream 2, e cila ende nuk ishte vënë në funksion.