POP 5

Lajmet më të lexuara të 5 minutave të fundit

Krijohet 'Tirana Agrikulturë'! Thyhet monopoli i tregut agro-ushqimor

Bashkia e Tiranës ka vendosur që t’I japë fund monopolit në tregun agro-ushqimor të kryeqytetit, çka vitet e fundit ka rënduar me kosot shtesë jetesën e qytetarëve dhe jo vetëm kaq. Të gjithë ata që merren me bujqësi dhe blegtori në zonat rurale të Bashkisë së Tiranës, do të kenë tashmë një alternativëmë shumë për të shitur produktet e tyre. Në mbledhjen e djeshme Këshilli Bashkiak i Tiranës vendosi krijimin e shoqërisë së re “Tirana Agrikulturë”, e cila synon përmirësimin e cilësisë së jetës së banorëve të zonave rurale përmes nxitjes së ekonomive familjare me orientim kryesisht bujqësor dhe blegtoral, të ndërthurur me agroturizëm dhe ekoturizëm.

Gjatë fjalës së tij para Këshillit kreu i Bashkisë së Tiranës, Erion Veliaj vlerësoi se nëpërmjet kësaj shoqërie ndihmohet nxitja e prodhimit dhe shitjes së produkteve të agrikulturës, përmes ndërmjetësimit për lidhjen e kontratave ndërmjet personave fizik apo juridik, publik, shtetëror e privat vendas e të huaj, si dhe organizimit të panaireve, ekspozitave dhe promovimin e prodhimeve lokale.

“Krijimi i shoqërisë “Tirana Agrikulturë” do të sjellë disa të mira: së pari, kemi pasur një debat mbi monopolin e shitjes së ushqimeve bujqësore me shumicë në Tiranë. Ky monopol duhet thyer, siç bëmë me monopolin e pastrimit, duke e kthyer në një kompani publike; sot, kjo kompani publike do të krijojë qendra të lira të shitjes me shumicë. Pra, duam ta kthejmë në një agregator biznesi, bujqësor, përveç se një qendër të shitjes me shumicë. Ky është një lajm i mirë për gjithë Tiranën bujqësore, e cila deri dje detyrohej të shkonte në një vend të përcaktuar nga qeveritë e kaluara. Hapi i parë është krijimi i një kompanie publike, që do të menaxhojë tregjet me shumicë të fruta-perimeve në Tiranë, dhe pastaj më tej, të hyjë edhe në programe të bujqësisë”, tha Veliaj.

G.M./Shqiptarja.com
Komento

Komente

  • ...: 04/05/2019 10:19

    Me ne fund ka pak konkurence

    Përgjigju