Kryebashkiaku i PD del kundër
Bashës,çfarë bëri më 29 Nëntor

Festat e 28-29 Nëntorit, përkatësisht Dita e Pavarësisë dhe ajo e Çlirimit të Shqipërisë, nxori dukshëm në pah ndarjen e thellë mes palëve politike në vend, por edhe më tej, ndarjen brenda llojit. Partia Demokratike nuk iu është bashkuar në asnjë çast homazheve të kryera nga mazhoranca në nder të dëshmorëve të rënë për liri.

Ajo i ka kryer homazhet e vetme, ku ditën zyrtare të çlirimit të Shqipërisë ka ditën 28 nëntor dhe për rrjedhojë i ka kryer homazhet në këtë ditë. Por, ajo që ka tërhequr vëmendje është kryebashkiaku i djathtë në Bashkinë e Pogradecit, Eduart Kapri, i cili ndryshe nga anëtarët e PD në mbarë vendin, të cilët nuk kanë kryer asnjë homazh më 29 nëntor, ka zhvilluar homazhe, si dhe disa aktivitete kulturore në qytetin që ai drejton.

Kjo është bërë e ditur edhe në faqen zyrtare të Bashkisë Pogradec në ‘Facebook’, ku janë publikuar disa foto, ku mes të tjerave shfaqet dhe kryebashkiaku duke kryer homazhe.

“29 Nëntori, Dita e Çlirimit të Shqipërisë është një datë e lavdishme e historisë së popullit shqiptar pasi njihet si dita e çlirimit nga pushtuesit nazifashistë. Kjo datë qëndron në histori si një lapidar i lartë në krah të 28 nëntorit, Ditës së Pavarësisë Kombëtare dhe është një fakt historik që është vulosur me luftën e gjakun e luftëtarëve.

Kryetari i Bashkisë z. Eduart Kapri, dhe përfaqësues te administratës pranë Bashkisë Pogradec ishin të pranishëm sot në ceremoninë përkujtimore që u zhvillua në nder të Dëshmorëve të Kombit! Pas fjalimit të rastit, zoti Kapri bashkë me të pranishmit vendosën kurora me lule në nder të të rënëve, dhe vizituan muzeun, ku u njohën me foto dhe dokumente që i përkasin periudhës të Luftës Nacional Çlirimtare”, shkruhet në postimin e bashkisë.


(Postimi i Bashkisë Pogradec për homazhet e zhvilluara më 29 Nëntor)

d.c./shqiptarja.com