Ky takim i përgatitur në Bibliotekën Kombëtare në Riga filloi me pritjen e Përfaqësueses së lartë të BE-së për Politikën e Jashtme dhe Siguri Federica Mogherini dhe ministrit të Jashtëm letonez, ku së bashku edhe me kryetarin e Presidencës së BE-së, Edgar Rinkevics u takuan me ministrat e jashtëm të vendeve kandidate për në BE.
Përveç ministrave të vendeve anëtare, në takim ishin ftuar edhe ministrat e jashtëm të vendeve kandidat për anëtarësim në BE – Shqipërisë, Turqisë, Serbisë, Malit të Zi dhe Maqedonisë, të përfaqësuar nga ministri turk, Mevlut Çavusoglu, ministri i Serbisë, Ivica Daçiç dhe kryediplomati maqedonas, Nikolla Poposki.
Ky takim është takimi i parë i këtij formati ku Shqipëria ftohet pas marrjes së statusit të vendit kandidat. Në kuadër të rishikimit të politikave të BE-së ndaj fqinjëve të saj, diskutimet gjatë sesioneve të punës u përqendruan tek kriza aktuale në Ukrainë, marrëdhëniet e BE-së me Rusinë, Partneriteti Lindor dhe në Strategjinë e Sigurisë së BE-së në përballimin e krizave.
Ministri Bushati në fjalën e tij përcolli këndvështrimin e politikës së jashtme shqiptare ndaj situatës në Ukrainë, si dhe ndaj kërcënimeve që vijnë prej rajoneve në jug të Evropës, si Siria, Iraku, Libia, etj.
Gjithashtu Ministri u shpreh se: "të gjitha këto kërcënime nënvizojnë rëndësinë e Ballkanit Perëndimor për garantimin e sigurisë evropiane, ndaj është në interes të BE-së një politikë zgjerimi i suksesshëm në rajonin tonë".
Ministri u ndal në masat që ka marrë qeveria shqiptare në luftën kundër terrorizmit, si dhe për nevojën e ndërveprimit mes vendeve të rajonit e më gjerë. Ai theksoi rëndësinë që merr në situatën e krijuar nga krizat aktuale, konsolidimi i sigurisë në rajonin e Ballkanit Perëndimor, për çka nevojitet forcim i bashkëpunimit, si dhe ndihmë thelbësore nga ana e BE për vijimësinë e reformave.
Redaksia Online
(g.f/Shqiptarja.com)