Kryetarja e LSI-së Monika Kryemadhi gjatë qëndrimit të saj në SHBA zhvilloi një takim me diplomatin e Departamentit të Shtetit, Ambasadorin Special në Luftën Kundër Trafikut të Qenieve Njerëzore, John Richmond.

Përmes një postimi në profilin e saj, Kryemadhi ka falenderuar Richmond mbi udhëheqjen që SHBA ka marrë në luftën globale kundër trafikimit të qenieve njerëzore.

“Vizioni i Presidenti Donald Trump, së bashku me mesazhet e Mike Pence dhe Ivanka Trump në Samitin e Shtëpisë së Bardhë për Luftën e Trafikimit të Qenieve Njerëzore janë një thirrje për të gjithë botën për të garantuar jetën dhe liritë e njeriut”, ka thënë Kryemadhi.

Ajo është shprehur se është e bindur mbi partneritetin SHBA-Shqipëri, për ta bërë Shqipërinë një vend më të sigurt për fëmijët dhe gratë, duke siguruar mbështetje për viktimat dhe për të kapur çdo trafikant.