Kryeministri Conte uron Pashkët: Na mungojnë buzëqeshjet, përqafimet e shtrëngimet e duarve në kishë

Shumë pak besimtarë në të gjithë botën i kanë kryer ritet e tyre fetare dhe shumë prej tyre kanë ndjekur meshën e së djelës online.

Edhe kryeministri italian Giuseppe Conte ka uruar të gjithë besimtarët me rastin e festës së Pashkëve.

“Gëzuar Pashkën për të gjithë italianët. Atyre që vuajnë sot, atyre që luftojnë në repartet spitalore për të larguar lotët dhe dhimbjet nga komuniteti i tyre”, është shprehur Conte.

Ai ka theksuar se sakrificat që po bën secili prej nesh janë një gjest i lidhjes autentike ndaj asaj që me të vërtetë ka rëndësi dhe asaj që do të jemi në gjendje të rimarrim së shpejti, duke ia dalë së bashku.

“Na mungojnë buzëqeshjet e të afërmve, përqafimet e miqve, traditat e bukura të vendeve tona, shtrëngimet e duarve në kishë, në sheshe, në bare. Sot nuk është një festë si herët e tjera, por as nuk do të jetë nesër kështu”, përfundoi kryeministri.

TAG:
• pashket
• Giuseppe Conte
• Koronavirus