Kryepeshkopi Irinej ankohet për jetën
“nën mure” të serbëve në Kosovë

Pas polemikave të shumta gjatë vizitës së tij në Tiranë, kryepeshkopi serb, patriarku Irinej ka ngjallur të tjera debate lidhur me vizitën e tij të fundit në Kosovë. Kreu i Kishës ortodokse serbe është ankuar në mediat serbe për jetën e popullatës serbe në veri të Kosovës.
 
Sipas tij, jetesa e pakicës serbe pas luftës nuk është ende e normalizuar, pasi ata janë të privuar nga liria.
 
Irinej ka cituar se sado të jepen deklarata se jeta është normalizuar, ajo është realisht larg normalitetit. Më së miri flasin muret e Patriakanës së Pejës dhe muret përreth manastirit të Deçanit.
 
“Jeta e serbëve në Kosovë është e sigurt vetëm kur ata struken nën mure”, thekson Irinej. Patriarku ka thënë se jeta mes mureve nuk mund të quhet e tillë, por është një gjendje që njeriu nuk mund t’ia dëshirojë askujt. “Jeta e kishës sonë është e barabartë me jetën e popullit tonë në Kosovë. Ai popull është i privuar nga më elementarja, e ajo është liria... e lëvizjes së lirë, e punës së lirë, e shkollimit e të tjera” citon Irinej në të përditshmen serbe, “Politika”.

Redaksia Online
(b.b/e.s/shqiptarja.com)