Kryeqyteti në 'shtetrrethim', derbi Tirana - Partizani bllokon rrugët! Policia: Asnjë tifoz nuk futet në stadium pa mjet identifikimi

Tirana dhe Partizani luajnë nesër në 20:00 për javën e 15-të të Superligës. Sfida zhvillohet në "Air Albania" në kryeqytet, me policinë që ka publikuar planin e masave për këtë duel. Për të shmangur çdo lloj problematike, policia bën me dije se do jenë të shumta rrugët që do bllokohen qysh prej orës 17:00 të ditës së nesërme. Blutë bëjnë me dije se asnjë tifoz nuk do futet në stadium pa mjet identifikimi apo dokument nga prindërit nëse është i pashoqëruar apo nën 16-vjeç. Gjithashtu lëvizja e dy tifozerive do bëhet e organizuar dhe me shoqërimin e policisë për të shmangur përplasjet.

Masat e policisë për derbin Tirana - Partizani:

Policia e Tiranës ka hartuar plan masash për ruajtjen e rendit dhe sigurisë para, gjatë dhe pas zhvillimit të ndeshjes së futbollit midis ekipeve të futbollit Tirana dhe Partizani, që do të zhvillohet më datë 21.12.2022, në orën 20:00, në stadiumin “Air Albania”. 

Masat e marra nga Policia e Tiranës konsistojnë jo vetëm në ambientet e stadiumit, por dhe në një perimetër më të gjerë jashtë tij.

Në këtë kuadër do të ketë bllokime të disa segmenteve rrugore, si dhe bllokime të pjesshme të disa segmenteve rrugore, gjatë momentit të kalimit të tifozëve.

Segmentet rrugore që do të jenë të bllokuara, nga ora 17:00 deri në përfundim të aktivitetit, janë:

– Rruga “Lek Dukagjini”, përreth stadiumit, rruga “Dervish Hima”, rruga “Gjergj Filipi”, rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” .

Në rast se do të ketë marshime të tifozëve të të dyja skuadrave, do të ndjekin itinerarin si më poshtë:       

– Lëvizja e tifozëve të Tiranës do të bëhet nga Teatri i Operas dhe Baletit, rruga "Bajram Curri", Rruga “ Papa Gjon Pali II " – stadiumi; 

– Lëvizja e tifozëve të Partizanit do të bëhet nga kryqëzimi i rrugës “Muhamet Gjollesha” me rrugën “Artan Lenja”, përgjatë rrugës “Muhamet Gjollesha”, rruga “Sulejman Delvina”, rruga “Ibrahim Rugova” - sheshi “Shopen”, rruga “Lek Dukagjini” - stadiumi.

Policia do të garantojë dhe do të sigurojë lëvizjen e tifozëve përgjatë rrugëkalimeve të caktuara dhe nuk do të lejojë grumbullim apo kalim të tifozëve, jashtë itinerarit të caktuar. 

Po në zbatim të planit të masave, do të ushtrohen kontrolle ndaj tifozëve, para hyrjes në stadium, për sende të kundërligjshme (sende të forta, bidonë uji, çadra, çelësa metalik apo lëndë piroteknike etj). Çdo tifoz duhet të jetë i pajisur me dokument identifikimi.

Nuk do të lejohen të futen në stadium persona pa dokument identifikimi, si dhe fëmijët nën moshën 16 vjeç, pa praninë e prindit apo kujdestarit (shoqëruar me dokument).

Gjithashtu, nuk do të lejohen të futen në stadium të gjithë ata tifozë të cilët në aktivitete të ndryshme sportive janë të identifikuar nga Policia, si tifozë problematikë.

Shërbimet e Policisë, në rast të prishjes së rendit dhe qetësisë publike, do të ndërhyjnë si në ambientet e jashtme të stadiumit, ashtu dhe në ambientet e brendshme, për rivendosjen e rendit dhe shoqërimin e personave që do shkaktojnë trazira apo kryejnë veprime antisportive.

Policia e Tiranës kërkon mirëkuptimin e tifozerive respektive, për zbatimin e detyrimeve të mësipërme, si dhe mirëkuptimin e qytetarëve për të evituar lëvizjen me automjete në segmentet rrugore të lartpërmendura, në oraret e caktuara.

S.DH/Shqiptarja.com

TAG:
• partizani
• Tirana KF
• derbi
• superliga shqiptare