Kuçi: Prona dhe e drejta e pronësisë e drejtë esenciale e secilit qytetar në Kosovë

/ATSH/. Prona dhe e drejta e pronësisë është e drejtë esenciale e secilit qytetar në Republikën e Kosovës, tha sot ministri i Drejtësisë, Hajredin Kuçi, në publikimin e raportit të OSBE lidhur me shqyrtimin e rasteve të riuzurpimit të paligjshëm në Kosovë.
Sipas OSBE-së, ky raport shqyrton reagimet e institucioneve të Kosovës në rastet e riuzurpimeve të paligjshme të pronave nën administrimin e Agjencisë kosovare të Pronës (AKP) dhe paraqet një vlerësim të trajnimit të përgjithshëm të rasteve të riuzurpimit të paligjshëm nga sistemi në fuqi.
"Prona dhe e drejta e pronësisë në Republikën e Kosovës, janë të drejta esenciale për secilin qytetar dhe gjejnë mbrojtje jo vetëm në kodet apo ligjet e Kosovës, por edhe në konventat ndërkombëtare sipas vlerave më të larta universale", tha ministri Kuçi. Ai vlerësoi se i është kushtuar rëndësi dhe kujdes që prona dhe e drejta e pronësisë të parashikohet në ligjet dhe Kushtetutën e Republikës së Kosovës.
"Uzurpimi i pronës është veprim kundërligjor, i cili është në kundërshtim me parimet kushtetuese dhe njerëzore në vendin tonë. Uzurpimi i pronës është i ndaluar dhe nuk mund të bëhet pronar askush mbi bazën e uzurpimit të pronës. Uzurpimi i pronës sipas legjislacionit në fuqi është edhe vepër penale në Nenin 332 të Kodit Penal të Republikës së Kosovës. Për më shumë, legjislacioni në fuqi garanton të drejtat e pjestarëve të komuniteteve pakicë, përkatësisht me Kushtetutë dhe me ligjet në fuqi garantohet parimi i mosdiskriminimit të pjesëtarëve të komuniteteve pakicë në cilindo aspekt, përfshirë edhe atë të pronësisë", ka thënë Kuçi.
Ministri ka vlerësuar punën e AKP-së, si institucioni kryesor i mandatuar për pronat, duke kontribuar në zgjidhjen e rasteve të pronësisë por edhe administrimin e pronave. Kuçi tha se është biseduar në Bruksel që do të themelohet edhe Agjencia Kosovare për Verifikimin e Pronave dhe në këtë drejtim do të bëhen angazhime që Agjencia të ketë jo vetëm fuqi juridike për lirimin e pronave por edhe menaxhimin e pronave derisa të gjendet pronari i ligjshëm.
Kuçi ka vlerësuar raportin si shumë konstruktiv, i cili, sipas tij, njëherësh do të jetë si udhërrëfyes për institucionet e Kosovës për koordinim më të mirë, efikasitet më të lartë dhe garanci qytetare se prona është e mbrojtur pa marrë parasysh karakterin etnik dhe se uzurpuesi do të dënohet pa marrë parasysh etnicitetin e tij.
Në publikimin e këtij raporti, të pranishëm kanë qenë Ambasadori i OSBE-së në Kosovë, Jean-Claude Schlumberger, dhe Shefi i Zyrës së BE-së në Kosovë, Samuel Zbogar, i cili ka vlerësuar këtë raport të publikuar nga OSBE dhe ka theksuar se rezultatet e këtij raporti zbardhin një problematikë dhe njëherësh ky raport hap rrugën për veprimet e mëtejshme.

TAG:
• OSBE