Kukësi mposht Skënderbeun
Partizani nuk përfiton, 1-1 në Vlorë

Kukësi ka ndaluar sot Skënderbeun e vendit të parë duke iu marrë korçarëve një fitore minimale.

Golin e vetëm të takimit e shënoi Ylli Shameti në minutën e 18-të pas një goditje këndi të ekzekutuar nga Mici.

Ky i fundit ka krosuar në zonë dhe topi është goditur me kokë nga Malota, drejt portës së mbrojtur nga Shehi. Portieri i Skënderbeut ka arritur ta ndalë goditjen, por topi ka mbetur në zonë. Ka mjaftuar vetëm një shtyrje e lehtë nga Shameti për ta çuar sferën në rrjetë dhe për të vulosur edhe fatin e takimit. Miqtë pretenduan për një pozicion jashtë lojë të Shametit, por sipas gjyqtarit, goli ishte i vlefshëm.

Pas përballjes së sotme në stadiumin e Kuksit “Zeqir Ymeri”, vendasit janë ngjitur në kuotën e 51 pikëve, duke forcuar pozitat në vendin e tretë.

Ndërsa Skënderbeu, edhe pas kësaj humbjeje vijon të mbajë kryesimin, me 66 pikë.

Partizani nuk përfiton nga humbja e Skënderbeut 
Partizani nuk ka arritur të shfrytëzojë humbjen e Skënderbeut në Kukës. Të kuqtë patën të gjitha mundësitë ta çonin në 3 pikë diferencën, por morën vetëm një barazim 1-1 në Vlorë ndaj Flamurtarit.



Golit të minutës së 40 nga Sukaj vendasit, edhe pse vonë, iu përgjigjën me anë të Danilo Alves, i cili vulosi rezultatin në 1-1 vetëm 3 minuta para përfundimit të kohës së rregullt.

Ky rezultat nuk i shërben aspak vlonjatëve, të cilët vazhdojnë të jenë mes skuadrave që luftojnë për mbijetesë.

Tre pikë mori edhe Tirana, e cila fitoi 1-0 me Laçin, me gol të shënuar sërish nga Elis Bakaj, që po kalon një formë të shkëlqyer. Me këtë fitore bardheblutë ngjitet në kuotën e 47 pikëve, 1 më pak se Teuta e vendit të katërt.


Redaksia Online
(m.b/shqiptarja.com)