“Ec si unë, hyr në botën time”, është fushata 15-ditore ndërgjegjësuese që po zhvillohet në Tiranë me synimin që të luftohen paragjykimet për personat që jetojnë me sklerozë multiple. Report Tv foli me 28-vjeçaren Wendy Mema, e cila tregon betejën prej vitesh me sëmundjen. Nga lodhja kronike dhe humbja e dëgjimit e deri te problemet me ekuilibrin, e reja rrëfen vështirësitë e diagnostikimit dhe mungesën e mbështetjes për pacientët në Shqipëri.

***

Diagnostikimi me Sklerozë të shumëfishtë i ndryshoi jetën Wendy Mema, por jo mënyrën se si ajo zgjodhi ta jetojë atë.

Teksa kanë kaluar vetëm 3 vite nga momenti kur ajo mësoi nga çfarë vuan, 28-vjeçarja shfaqet e buzëqeshur përballë një sëmundjeje me të cilën thotë se ka mësuar të bashkëjetojë.

Lodhja e vazhdueshme, mungesa e energjisë dhe më pas humbja e dëgjimit në njërin vesh ishin shenjat e para që paralajmëruan se diçka nuk shkonte me shëndetin e saj.

“Kur zgjohesha në mëngjes isha shumë e lodhur edhe i vija vetes epitete: dembele pse e bën këtë? pse ja bën këtë vetes? Në një pikë më humba dëgjimin nga një vesh me 60%. Shkova tek doktoresha e veshit dhe ajo më tha: Nuk ka asnjë problem. Bëj një skaner. E bëra në Durrës. Ka sklerozë multiple me thanë thanë",- thotë ajo.

Për të konfirmuar diagnozën, Wendy tregon se iu desh të shkonte në Itali, pasi ekzaminimet dhe trajtimi në Shqipëri ishin të kushtueshme ose kërkonin pritje të gjata. Ajo e dinte se bëhej fjalë për një sëmundje që mund të përkeqësohej me kalimin e kohës.

“Ishim në panik, sepse kjo sëmundje degjeneronte. Ma dhanë diagnozën atje në Bari, në Altamura ndiqem tani dhe marr një ilaç ozanimoll që nuk është këtu. Kjo sëmundje nuk ka kurë domethënë nuk shërohet. Do e kesh gjithë jetën edhe progreson, degjeneron. Relapse Remitting që kam unë, RMRMS-ja, është që kur do ndizet, kur do fiket",- thotë Wendy.

Ëendi shpjegon se skleroza e shumëfishtë nuk është thjesht harresë, siç perceptohet shpesh nga njerëzit, por një sëmundje autoimune që prek sistemin nervor dhe sjell probleme të shumta fizike e emocionale.

“Problemi më i madh për mua është ekuilibri. Kam lezione edhe në shtyllën kurrizore dhe eci si e dehur nëse nuk kam dikë për krahu. Më ka ndodhur të rrëzohem pa kuptuar fare pse. Depresioni, lodhja kronike. Nuk është një lodhje, vij në shtëpi nga puna  dhe jam i lodhur. Është një lodhje që fillon qe në mëngjes, nuk ke pushuar kur ke fjetur gjumë",- tregon Wendy.

28-vjeçarja tregon se kjo sëmundje ka prekur edhe familjen e saj. Në vitin 2000, ajo humbi gjyshin.

“Gjyshi im ishte inxhinier gjeolog. I filloi depresioni, pastaj ju paralizuan këmbët, pastaj ju morë goja që është një simptomë e Relapse Remitting edhe vdiq nga kjo gjëja",- thotë Wendy.

Sot, Wendy thotë se ka mësuar ta pranojë sëmundjen dhe i nxit të rinjtë të flasin hapur për problemet e tyre dhe të kërkojnë ndihmë psikologjike.

“Flisni me njerëzit, kërkoni ndihmë. Është thjesht një sëmundje. Të gjithë kanë nga një betejë, edhe pse jo gjithmonë e tregojnë",- tregon Wendy.

Skleroza e shumëfishtë  është një sëmundje kronike autoimune që dëmton sistemin nervor qendror. Ajo shkaktohet kur sistemi imunitar sulmon gabimisht mielinën, duke ngadalësuar ose ndërprerë sinjalet midis trurit dhe trupit. Kryesisht zbulohet te moshat 20-30 vjeç dhe prek më shumë femrat.