Kurti: Ndërhyrja e NATO-së në Kosovë mban vulën e Madeleine Albrightit

Kryeministri i Kosovës, Albin Kurti dhe kryetari i Kuvendit të Kosovës, Glauk Konjufca, kanë bërë homazhe te busti i ish-Sekretares amerikane të Shtetit, Madeleine Albright, e cila ka vdekur më 23 mars në moshën 84-vjeçare.

Kryeministri Kurti tha të enjten, 24 mars, se ndërhyrja e NATO-së, për të ndalur gjenocidin në Kosovë – me bombardimet kundër Serbisë – mban vulën e zonjës Albright.

Kosova dhe populli i saj, tha Kurti do të jenë gjithmonë falënderues dhe mirënjohës.

“Dija e saj e thellë, mendja e mbrehtë, dashuria e paepur për të drejtat dhe liritë e qytetarit në republikë, orientimi i saj për demokracinë sociale dhe njohuritë e jashtëzakonshme për gjeopolitikën, e bëjnë një personalitet, i cili do të kumbojë gjatë, jo vetëm në politikën dhe qeverisjen në SHBA e te ne në Kosovë, por edhe në shumë vende tjera të botës”, tha Kurti.

Sipas Kurtit, politika, diplomacia dhe historia, vështirë se kombinohen në një mënyrë më të përsosur sesa te personaliteti i ish-Sekretares së ndjerë Albright.

Konjufca tha se populli i Kosovës kurrë nuk do ta harrojë dhe gjithmonë do të jetë mirënjohës për kontributin e jashtëzakonshëm që ka dhënë Albright në çlirimin dhe lirinë e popullit të Kosovës.

“Ajo bashkë me presidentin Bill Clinton, ishte forca kryesore shtytëse në planin ndërkombëtar për të ndalur gjenocidin e shtetit të Serbisë në popullin e Kosovës”, tha Konjufca.

Madeleine Albright ishte gruaja e parë e zgjedhur në pozitën e Sekretares amerikane të Shtetit më 1997.

Ajo shërbeu në këtë pozitë deri më vitin 2001, në administratën e Bill Clintonit.

Albright ka qenë Sekretare e Shtetit në kohën kur janë kryer sulmet e NATO-s mbi caqet serbe, që kanë çuar në çlirimin e Kosovës.

Albright ishte figurë qendrore në administratën e presidentit Bill Clinton.

Për shkak të punës së saj për demokraci dhe të drejtat e njeriut, ajo më 2012 ishte nderuar me Medaljen Presidenciale të Lirisë, që është çmimi më i lartë civil në SHBA.

Për kontributin e saj për çlirimin e Kosovës, në Prishtinë, më 2019, në përvjetorin e 20-të të hyrjes së trupave të NATO-s, u zbulua në Prishtinë busti për nder të saj.

Po atë vit, Kosova e kishte dekoruar ish-Sekretaren Albright me Urdhrin e Lirisë./REL

M.Q./Shqiptarja.com

TAG:
• Madeleine Albright
• Albin Kurti