Kurti për 'The Independent': Ballkani në rrezik, Kosova me urgjencë t’i bashkohet NATO-s

Kryeministri i Kosovës, Albin Kurti ka thënë për “The Independent” se Perëndimi duhet të dallojë synimin e Rusisë për të kryer gjenocid në Ukrainë, derisa ka paralajmëruar se edhe Kosova mund të jetë vendi i radhës që do të përballet me agresionin ekspansionist të Rusisë.

Ai i tha “The Independent” se ashtu sikurse Kosova që u përball me spastrim etnik kundër shqiptarëve nga duart e forcave jugosllave dhe serbe në vitet e 90-ta, një akt i ngjashëm shkatërrues është duke u zhvilluar tani në Ukrainë.

“Ky invazion rus, ky agresion ushtarak nuk është më politik. Është gjenocid. Shihet qëllimi genocidal që rezulton në aspekte logjistike dhe demografike”, tha Kurti.

LEXO EDHE:
Shef i NATO-s, Mark Rutte viziton sot Turqinë ku do takohet me Erdogan dhe Fidan! Nesër do të jetë në Athinë

“Kur shoh se çfarë po ndodh në Kiev, duket se kjo është një tjetër Sarajevë në përgatitje,” shtoi ai.

Kurti vizitoi Londrën këtë javë për të dyfishuar përpjekjet diplomatike të vendit për t’u anëtarësuar në NATO. Aleanca ushtarake transatlantike ndërhyri në luftën e Kosovës në vitin 1999, me një bombardim ajror të caqeve serbe pas dështimit të përpjekjeve ndërkombëtare për të ndërmjetësuar paqen. Pas pushtimit të Ukrainës, Kurti shpreh brengën e tij se Kosova mund të përballet me një konflikt ushtarak të ndërmjetëm, pasi Rusia ushtron ndikimin e saj politik në Serbi.

Paralajmërimet e tij vijnë pas një grumbullimi të forcave ushtarake në kufirin verior të Kosovës në fund të vitit të kaluar, që përfshinte tanke të prodhuara në Rusi dhe avionë luftarakë MiG.

“Mendoj se Ballkani Perëndimor është në rrezik edhe më të madh se vendet baltike dhe Moldavia, sepse atje Rusia do të kishte ndarë një pjesë të forcës së saj ushtarake. Në rastin e Ballkanit Perëndimor nuk do të duhej ta bënte fare këtë, sepse Serbia mund të jetë vlerë e shtuar e agresionit të tyre ushtarak”, tha Kurti.

“Ne do të donim të anëtarësohemi në NATO sa më shpejt të jetë e mundur”, ka theksuar Kurti. Ai tha për “The Independent” se insiston që NATO të jetë shumë më vigjilente se sa është tashmë.

“Në Moskë kemi një udhëheqës të fuqishëm që po pakëson rrugët e tij të arratisjes. Ai nuk është një person që duket i gatshëm të bëjë paqe, përkundrazi do të bëjë përpjekje për zgjerim të luftës. Kjo është arsyeja pse jemi në rrezik”, ka shtuar ai.

Megjithatë, Kosova nuk mund të realizojë anëtarësim të shpejtë në NATO. Derisa më shumë se 100 vende e kanë njohur Kosovën si shtet të pavarur, katër shtetet anëtare të NATO-s nuk e kanë bërë këtë. Vendi gjithashtu nuk është anëtar i OKB-së, si rezultat i kundërshtimeve ruse.

Kurti ka kërkuar që, të paktën, forcat e NATO-s të shqyrtojnë shtimin e pranisë ushtarake në Kosovë.

Serbia ka lidhje të ngushta me Rusinë dhe ka kryer stërvitje të përbashkëta ushtarake me këtë vend, në tetor të vitit të kaluar. Agjencia ruse e lajmeve TASS raportoi se presidenti serb Aleksandër Vuçiç, tha se të dy vendet kanë mbajtur 96 stërvitje të përbashkëta në vitin 2019. Shumica e armëve të Serbisë janë të importuara nga Rusia, sipas CIA World Factbook.

Analistët rajonalë kanë vënë në dukje gjithashtu se infrastruktura energjetike dhe kompanitë e të dy vendeve janë gjithashtu të ndërlidhura ngushtë, gjë që mund të shkaktojë efekte të dëmshme për ekonominë e Serbisë në vazhdën e sanksioneve të ashpra perëndimore kundër Rusisë.

Kurti tha se, që nga fundi i vitit të kaluar, dukej se Serbia, si e “autorizuar” e Rusisë, ishte “gati për të sulmuar” në kufirin verior me Kosovën. Trupat serbe në kufi u inspektuan nga ambasadori rus në Beograd, Alexander Botsan-Kharchenko, së bashku me politikanë të lartë serbë.

“Kur keni të bëni me Federatën Ruse dhe përfaqësuesit e saj në Ballkanin Perëndimor, mund të tronditeni, por asnjëherë të habiteni, sepse gjatë gjithë kohës ata ju japin prova dhe jo indikacione për sulmin e tyre të ardhshëm”, tha Kurti.

Mes këtij përshkallëzimi të një mosmarrëveshjeje për targat, BE dhe SHBA u thanë Kosovës dhe Serbisë t’i ulnin tensionet.

Kurti tha se kronikat e lajmeve që shfaqin liderin bjellorus Aleksander Lukashenko para një harte që gdhendte Ukrainën, të kujtonin drejtpërdrejt raportet e takimeve ndërmjet Vuçiçit dhe presidentit rus Vladimir Putin.

Qeveria ruse dhe vetë presidenti Vladimir Putin e kanë krahasuar aneksimin e Krimesë me situatën në Kosovë. Media serbe e lajmeve RTV raportoi se Vuçiç pretendoi se ai dhe Putini kishin diskutuar për “hipokrizinë në marrëdhëniet ndërkombëtare” dhe duke përdorur veriun e Kosovës si shembull gjatë të cilit politikani serb “i tregoi atij [zonën] në hartë”.

Serbia nuk e njeh Kosovën si shtet të pavarur dhe, për dallim nga shtetet e tjera evropiane, ka refuzuar të vendosë sanksione kundër Rusisë në prag të invazionit të saj në Ukrainë.

“Ata [Rusia] ishin i vetmi vend që nuk kishte vendosur sanksione kundër nesh në vitet 1990,” tha Vuçiç javën e kaluar, sipas një raporti nga Agjencia e lajmeve Reuters. Ai shtoi se Rusia e kishte mbështetur Serbinë në “integritetin e saj territorial në Organizatën e Kombeve të Bashkuara” duke refuzuar ta njohë pavarësinë e Kosovës. “Ne nuk duhet ta harrojmë këtë”, ka thënë Vuçiç.

Vuçiç shërbeu si ministër i informacionit nën Sllobodan Millosheviçin, kreun e parë në pozitë të një shteti që u gjykua për krime lufte për përfshirjen e tij në mizori gjatë konfliktit në Ballkanin Perëndimor.

J.GJ./Shqiptarja.com

TAG:
• Albin Kurti
• nato
• kosove