Kryeministri në detyrë i Kosovës, Albin Kurti, u takua këtë të mërkurë me shefin e ri të EULEX-it, Antero Lopes, i cili konfirmoi përkushtimin e misionit për dialog konstruktiv me institucionet e sundimit të ligjit në Kosovë.

Ky ishte takimi i parë mes Kurtit dhe Lopes që prej marrjes së detyrës nga ky i fundit. EULEX-i e cilësoi takimin si “të frytshëm”.

Sipas EULEX-it, Lopes “konfirmoi përkushtimin e EULEX-it për t’u angazhuar në një dialog konstruktiv me homologët e tij të sundimit të ligjit për ta çuar përpara llogaridhënien institucionale, drejtësinë dhe stabilitetin afatgjatë për të gjitha komunitetet”.

Takimi vjen në një kohë kur Komisioni Evropian ka përsëritur qëndrimin e tij për Urën e Ibrit, duke kërkuar koordinim të mirëfilltë dhe konsultime mes komunave të prekura dhe institucioneve qendrore të Kosovës përpara hapjes së saj.

Zëdhënësja e Komisionit Evropian, Anita Hipper, deklaroi më 18 gusht se Policia e Kosovës duhet të sigurojë të gjitha komunitetet, duke vepruar në përputhje me parimet demokratike, të drejtat e njeriut dhe sundimin e ligjit.

Hipper rikujtoi se Ura e Ibrit aktualisht është e kalueshme për këmbësorët, ndërsa qarkullimi i automjeteve ende nuk lejohet. Ajo tha se janë ndërmarrë hapa për këtë çështje, por BE-ja vazhdon të presë koordinim efektiv dhe konsultime kuptimplota.

Qëndrimi i Komisionit Evropian u bë publik pasi KFOR-i njoftoi më 10 gusht se kishte nisur “tranzicionin gradual” të pranisë së tij të përhershme në urë.

Ura kryesore mbi lumin Ibër lidh Mitrovicën e Jugut, ku shumicën e përbëjnë shqiptarët, me Mitrovicën e Veriut, të banuar kryesisht nga serbët.

Policia e Kosovës, EULEX-i dhe KFOR-i janë pjesë e mekanizmit të sigurisë me tre nivele në Kosovë, ku Policia është reaguesi i parë, EULEX-i i dyti dhe KFOR-i i treti.