Kutitë e Lezhës dhe Shkodrës
të veçuara nga kutiet e tjera

TIRANE - Të spostuara nga radha e kutive të shumta në magazinë, janë vetëm kutitë e qarkut të Lezhës si dhe të Shkodrës. Janë pikërisht këto dy qarqe, për të cilat palët PD-PS dhe LSI po luftojnë për mbajtjen e një mandat deputeti në çdo qark. Qarku i Shkodrës, i cili është ende në proces rinumërimi të kutive të votimit ka gjithsej 8 KZAZ, nga të cilat janë numëruar deri më tani më shumë se gjysma e tyre, ku çdo ditë po numërohen nga 80 kuti.

Përsa i përket kutive të Qarkut të Lezhës, janë vetëm 15 copë prej tyre që janë shkëputur, të cilat në bazë të vendimit që pritet të japë Kolegji Zgjedhor sot do t`i nënshtrohen rinumërimit të tyre ose në të kundërt nëse kërkesa e LSI rrëzohet atëherë ato mbeten të mbyllura dhe nuk preken.

E njëta gjë është dhe për Shkodrën, kutitë e së cilës po vijojnë rinumërimin përditë në KQZ deri në një vendim të Kolegjit Zgjedhor që pritet të jepet seancën e nesërme. PS ka kërkuar ndalimin e procesit të rinumërimit në Shkodër si dhe konsiderimin e rinumërimit të pavlefshëm, ndonëse kërkesën për hapjen e kutive e kishte bërë PR.

Shkrimi u botua sot në gazetën Shqiptarja.com (print) 25.07.2013
 
Redaskia Online
(b.m/shqiptarja.com)

TAG:
• kqz