Kuvend, mazhoranca pa Dulen
PDIU në seancë, s’i bindet PD-së

TIRANE- Votimi i dekreteve të Presidentit ka shënuar dje mungesën në seancë të kreut të PBDNJ-së Vangjel Dule, por sërisht PS-LSI kanë siguruar prezencën e deputetëve të PDIU. Dule kishte paralajmëruar, në 31 korrik, se do të shkëpuste marrëdhëniet me mazhorancën, nëse ajo do të kalonte në Kuvend hartën e re territoriale me 61 njësi vendore. Mësohet se gjatë këtij muaji nuk ka pasur asnjë takim zyrtar mes kryeministrit Rama dhe nënkryetarit të Kuvendit Dule për të diskutuar në lidhje me një shkëputje të mundshme të PBDNJ-së nga mazhoranca.

Një muaj më parë, kur u votua reforma territoriale, organizata “Omonia” i kërkoi PBDNJ-së të mos tregohet e nxituar në shkëputjen nga mazhoranca por të ngrijë në mënyrë të menjëhershme marrëdhëniet me qeverinë. Sipas kësaj organizate duhet zhvilluar më parë një mbledhje e përgjthshme mes strukturave të PBDNJ-së dhe anëtarëve të komunitetit grek dhe më pas realizimit të një vendimmarrjeje në lidhje me koalicionin qeverisës. Ndërkohë që vetë maxhoranca nuk ndihet e kërcënuar në numra votash, për shkak se tashmë që ka marrë mbështetjen për reformën territoriale pret të zyrtarizojë edhe një aleancë me Partinë për Drejtësi Integrim dhe Unitet.

PDIU
Rreth tri orë pasi PD deklaroi publikisht vendimin e opozitës për të bojkotuar parlamentin kreu i PDIU-së, Shpëtim Idrizi u shfaq në kuvend. Idrizi ka mbërritur dje në kuvend rreth orës 17:20 minuta i shoqëruar nga deputeti i partisë së tij, Aqif Rakipi. Gjatë seancës deputetët e PDIU-së, qëndrimin e vetëm e kanë mbajtur gjatë votimit ku me vendim politik kanë votuar pro 4 dekreteve të Presidentit, ndërkohë që kanë rrëzuar dekretin për Reformën Administrative-Territoriale. Lidhur me dekretin për shkarkimin e ministrit Ilirjan Celibashi si ministrër i Shtetit dhe Marrëdhënieve me Parlamentin dhe zëvendësimin e tij me deputeten Ermonela Felaj, deputetët e PDIU-së kanë abstenuar. Kuvendi i dha mandatin e ministres Ermonela Felajt me 76 vota pro, 3 abstenimeve të PDIU-së dhe votës kundër gabimisht të kreut të Kuvendit Meta.

Hyrja për deputetët e mazhorancës në seancën plenare është bërë duke kaluar përmes protestës që zhvillohej nga shoqëria civile për shkarkimin e guvernatorit Ardian Fullani. Deputetët ktheheshin në seancë pas një pushimi një mujor i cili reflektohej edhe në ngjyrën e marrë prej tyre nga pushimet. Edhe pse shumë prej tyre kanë nxituar të hyjnë në Parlament, seanca sërish nisi me rreth 20 minuta vonesë. Por pavarësisht rëndësisë që kishin, apo dhe nga fakti se opozita nuk ka marrë pjesë, seanca ka përfunduar brenda 90 minutave. Ndërsa do të nisin dhe diskutimet për nismat e tjera parlamentare.


Shkrimi u botua në Shqiptarja.com (print) në 2 Shtator 2014

Redaksia Online
(d.a/shqiptarja.com)  
 

/Shqiptarja.com