As kjo seancë plenare, ku duhej të flitej për problemet e qytetarëve, nuk u lejua të zhvillohej në kushte normale dhe u mbyll për vetëm 7 minuta.

Të vendosur për të çuar përpara aksionin e tyre, grupi i rithemelimit vunë në zbatim të njëjtin skenar, duke bllokuar foltoren, përdorur zhurmues e pankarta.

Si rrallëherë në këto muaj grupi i deputetëve të Rithemelimit ishte i plotë me në krye Gazment Bardhin, përveç Edi Palokës, i cili vuan ende përjashtimin rekord prej 40 ditësh që prej 9 shkurtit.

Deputetët të cilët ktheheshin nga një javë aktive në terren me zgjedhësit, e që duhet të sillnin në foltoren e parlamentit shqetësimet e tyre, nuk mundën për shkak të kaosit, duke bërë që parlamenti të shpërndahej edhe këtë herë pa asnjë rezultat.

I vetmi që pati konfrontime fizike me punonjësit e gardës ishte Flamur Noka, i cili nuk lejoi kolegun socialit Vullnet Sina të merrte fjalën.

Kryeministri Edi Rama dhe kreu I partisë Demokratike Lulzim Basha nuk ishin të pranishëm në këtë seancë. Ky I fundit kishte përqafuesit e grupit të tij, të cilët nuk i kursyen rezervat ndaj mazhorancës, duke mos  përmendur kaosin e krijuar nga deputetët e rithemelimit.

“Papërgjegjshmëria e qeverisë e paparë. Sot që ngrihen problemet e zgjedhësve gjysma e kabinetit nuk ishin në sallë. Sot i bëj thirrje ministres Balluku, kryeministrit që të bëjnë ndërhyrje të menjëhershme në projektin e rrugës Thumanë-Kashar sepse penalizon 85 mijë banorë dhe biznese”- u shpreh deputetja e PD Merita Bakiu.

Ndonëse  sërish pamundësuan zhvillimin normal të seancës, aksioni i rithemelimit këtë herë u duk më i zbutur, duke mos përdorur flakadanë, mjete piroteknike dhe kapsolla, përdorimi i të cilave me rregulloren e re do të çonte në përjashtimin e tyre me 2 muaj.

Rendit zhvillimet sipas orarit:
Ora 17:22
Seanca u mbyll mes kaosit, deputetja e PD Bakiu: Sot që ngrihen problemet e zgjedhësve, gjysma e kabinetit qeveritar nuk ishte në Kuvend

Merita Bakiu deputetja e PD, në mungesë të mbajtjes së fjalës në Kuvend për të përcjellë problemet e banorëve të zonës që ajo përfaqëson ka folur jashtë parlamentit. Ajo deklaroi se, 80 mijë banorë të Krujës janë penalizuar nga projekti i rrugës Thumanë-Kashar.

“80 mijë banorë të zonës së Krujës sot janë të penalizuar nga projekti i rrugës Thumanë-Kashar. Papërgjegjshmëria e qeverisë është e paparë. Sot që ngrihen problemet e zgjedhësve, gjysma e kabinetit qeveritar nuk ishin të pranishëm në sallë, që të dëgjojnë hallet e problemet e tyre. Seanca plenare nis me anëtarësimet e reja në PS”, tha ajo.

“Nuk shqetësohen se çfarë problemesh kanë qytetarët shqiptarë. I bëj thirrje kryeministrit Rama dhe ministres Balluku që të bëjnë ndërhyrje të menjëhershme në projektin e rrugës Thumanë-Kashar, për të bërë dalje që kalon në Bashkinë e Krujës. Është problem madhor sepse penalizon 80 mijë banorë, penalizon bizneset dhe izolon zonën”, nënvizoi deputetja Bakiu.

B.K/Shqiptarja.com

Ora 17:16
Noka përplaset me Gardën dhe i bllokon mikrofonin deputetit socialist me zhurmues

 

Deputeti i Rithemelimit, Flamur Noka ka vijuar me skenarin e tij të përhershëm të bllokimit të seancës plenare, duke u përplasur fizikisht me Gardën e Republikës dhe duke mos i lënë deputetët e mazhorancës të mbajnë fjalën e tyre. 

Ai i ndërpreu fjalën deputetit socialist, Vullnet Sinajt duke përdorur bilbil në mikrofonin e tij teksa ky i fundit po mbajte fjalim lidhur me problematikat e qytetarëve të evidentuara në terren.
 

B.V/Shqiptarja.com