Lafe: 95-vjetori i Kristo Frashërit
 vjen me 8000 mijë faqe histori

Lafe: 95-vjetori i Kristo Frashërit<br /> vjen me 8000 mijë faqe histori
Më 4 dhjetor, akademik Kristo Frashëri mbush 95 vjeç. Është i pari historian i Shqipërisë që arrin këtë moshë me penë në dorë. Pikërisht në këtë 95-vjetor të ditëlindjes së tij, brenda një viti ka botuar tri libra dhe për tri çështje të mëdha të historisë shqiptare. Ata janë “Historia e Çamërisë (Vështrim historik); “Kongresi i Përmetit (24-28 maj 1944). Vështrim historik dhe burime dokumentare” dhe “Shqipëria në Konferencën e Paqes në Paris 1946 ( Vështrim historik). Edhe pse në një gjendje të vështirë shëndetësore, historiani Kristo Frashëri vijon të ndjek me vëmendje botimet e ndryshme historike e dokumentare brenda e jashtë vendit, të hulumtojë arkivat dhe të botojë libra që kanë qenë në një proces të gjatë përpunimi e studimi në studion e tij, duke qëndruar në pritje si dorëshkrime gjysmë të gatshme… 

Profesor, Emil Lafe, duke i uruar ditëlindjen akademik Kristo Frashërit në emër të Shoqatës së së Gjuhësisë Shqiptare e shoqatës kulturore “Përmeti” shprehet për “Shqiptarja.com” se “Ky shekull i ri ka qenë veçanërisht i frytshëm për historianin tonë të mirënjohur”. Pasi përmend një listë të gjatë veprash, Lafe thotë se akademik Kristo Frashëri ka botuar 26 libra studimorë të veçantë me rreth 8000 faqe shtypi, që janë fryt i erudicionit, i përvojës së tij të gjatë dhe dokumenteve e materialeve të grumbulluara e të sistemuara me kujdes e me durim vite e vite me radhë.” Emil Lafe thekson se studimet historike të Kristo Frashërit shquhen “për objektivitetin shkencor të trajtimit dhe qëndrimin parimor në vlerësimin e faktorit shqiptar në historinë e rajonit e më gjerë; ato dallohen gjithashtu për mbrojtjen e vendosur të së vërtetës historike dhe të interesave kombëtare ndaj shtrembërimeve (të qëllimshme ose jo) të studiuesve të huaj dhe të bëjnë për vete me qartësinë e shtjellimit, me shprehjen dinamike, të rrjedhshme e të pastër, me stilin shkencor të përpunuar”.

Lafe kujton faktin se publiku shqiptar ka admiruar shkrimet e njëpasnjëshme të tij në shtypin masiv, me të cilat prof. Kristo Frashëri ka sqaruar me argumente bindëse të vërtetat historike rreth disa problemeve të mprehta kombëtare e shkencore.

Sipas Emil Lafes “Tërë vepra shkencore e prof. Kristo Frashërit përshkohet nga ndjenja e dinjitetit të lartë kombëtar dhe nga besimi te aftësitë e popullit të vet për të qenë i barabartë ndërmjet të barabartëve në botën e sotme.” Lafe na kujton në ditën e ditëlindjes së historianit të njohur se “Prof. Kristo Frashëri është një vlerë e lartë shkencore kombëtare dhe meriton, në radhë të parë, një përkrahje të përshtatshme e të përhershme shtetërore për t'i krijuar kushte më të mira jetese e pune, për të siguruar botimin e veprave të tij me kritere”.

Profesor Kristo Frashëri ka përfshirë ndër 26 librat e tij historik çdo nyje të qenësihme të historisë kombëtare; që nga etnogjeneza e shqiptarëve te  historia e Skënderbeut, te luftrat shqiptaro-turke, luftrat kundër copëtimit të Shqipërisë, historitë e tranzicionit deri te veprat që përfaqësojnë kthesa të rëndësishme në historinë e popullit shqiptar në dy shekujt e fundit

Redaksia Online
(Gre.M/Shqiptarja.com)

  • Sondazhi i ditës:

    A duhet miratuar rezoluta anti-korrupsion e propozuar nga PS?



×

Lajmi i fundit

Parashikimi i motit: E diela me shi e shtrëngat

Parashikimi i motit: E diela me shi e shtrëngat