POP 5

Lajmet më të lexuara të 5 minutave të fundit

Kronikë

Mbytet jahti me flamur holandez pranë Sarandës, policia kufitare shpëton 40-vjeçarin italian (VIDEO)

Mjeti lundrues rreth 16 m i gjatë ishte nisur nga ishulli i Korfuzit me destinacion portin e Sarandës, por 2.5 milje larg brigjeve shqiptare ka pësuar avari dhe për rrjedhojë është mbytur. Policia kufitare shpëton kapitenin italian i cili deklaroi më pas se ishte nisur për turizëm. Policia po heton shkaqet e mbytjes si dhe pistën e një udhëtimi që kishte tjetër qëllim nga turizmi. Report Tv sjell pamje nga operacioni i shpëtimit. 

SARANDË - Një jaht me flamur holandez, rreth 16 m i gjatë, i nisur nga ishulli i Korfuzit, është mbytur mesditën e sotme 2.5 milje larg bregdetit të Sarandës. Menjëherë pas lëshimit të sinjalit 'SOS' pranë vendit të quajtur Qefal në ujërat e detit Jon, në drejtim të jahtit janë nisur tre mjete të forcave të policisë kufitare të Sarandës. Ndërhyrja e menjëhershme e policisë ka bërë që të shpëtohet kapiteni i skafit, një shtetas italian, G.D, 40-vjeç nga Napoli.

Siç duket edhe nga pamjet e siguruara nga Report Tv, italiani ia ka dalë të mbijetojë në det të hapur falë varkës së shpëtimit të cilën e ka përdorur pas mbytjes së jahtit. Kanë qenë tre mjete lundrues të policisë kufitare, dy skafe dhe një gomone që kanë bërë të mundur evakuimin e italianit. Pas shumë lëvizjesh dhe kontrolli në det, njëra nga patrullat e Policisë Kufitare me mjetin e Policisë BP 01 në thellësi të ujërave, drejtimi “Gjiri i Inerteve”, ka konstatuar një mjet shpëtimi tip “sader” (plastik, mushama) pa motor dhe një person mbi të. Mësohet se 40-vjeçari ndodhet në gjendje të mirë shëndetësore dhe jashtë rrezikut për jetën.

Pasi është shoqëruar në komisariat, ai ka deklaruar se ishte nisur për turizëm dhe se udhëtonte i vetëm me jahtin e tij. Kjo konfirmohet edhe nga autoritetet portuale greke. Ai ka deklaruar se ishte nisur nga një port italian disa ditë më parë me destinacion fillimisht Korfuzin. Nga ishulli grek, italiani ka udhëtuar në drejtim të Shqipërisë mëngjesin e sotëm, por gjatë lundrimit në det jahti ka pësuar defekt çka ka bërë që të fundoset brenda pak minutash.  

Shtetasi italian ka falenderuar Policinë Kufitare që reagoi në kohë dhe i shpëtoi jetën pasi ndihej i rrezikuar për t'u mbytur. Nga ana tjetër policia kufitare ka nisur hetimet mbi shkaqet e mbytjes së mjetit lundrues, ndërsa po hetohet edhe pista e një udhëtimi që kishte tjetër qëllim nga turizmi.

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    20 Nëntor, 13:18

    Vrasja e 14 vjeçarit, çfarë duhet të bëjë Shqipëria me TikTok e Snap Chat?

Lajme të tjera



×

Lajmi i fundit

Vrasja e 14 vjeçarit/ Policia reagon për dëshminë e babait të shokut të Martinit: Nuk ka një autor të dytë

Vrasja e 14 vjeçarit/ Policia reagon për dëshminë e babait të shokut të Martinit: Nuk ka një autor të dytë

24 Nëntor, 14:28