Jensen Huang ka dhënë dorëheqjen me efekt të menjëhershëm nga postet e drejtorit ekzekutiv dhe presidentit të Nvidia, pas 33 vitesh në drejtimin e kompanisë që bashkëthemeloi.

Largimi i 63-vjeçarit vjen pas zbulimeve për dy lidhje jashtëmartesore. E para, të cilën Huang e ka pranuar, është me Alice Huang, drejtuese në kompaninë Megaspeed me bazë në Singapor, e cila dyshohet se është spiune e qeverisë kineze.

Lidhja e dytë, sipas raportimeve në media, është me Kimberly Powell, zëvendëspresidente e Nvidia.

Vendimi për largimin e Huang u mor pas një mbledhjeje të jashtëzakonshme dhe të gjatë të bordit drejtues, të zhvilluar natën e së mërkurës. Në përfundim të mbledhjes, bordi e falënderoi Huang për kontributin e tij “të jashtëzakonshëm” në kompani dhe në industri.

Drejtimin ekzekutiv të Nvidia do ta marrë përkohësisht drejtoresha financiare, Colette Kress, deri në zgjedhjen e një pasuesi. Ndërkohë, posti i presidentit do t'i kalojë Harvey C. Jones, investitor dhe ish-drejtues i kompanisë teknologjike Synopsys.

Bordi shprehu besimin se Kress do të jetë në gjendje ta drejtojë kompaninë gjatë kësaj periudhe, falë njohjes së saj të thellë të biznesit, klientëve, operacioneve dhe gjendjes financiare të Nvidia.

Megjithatë, tregjet financiare nuk e kanë pritur mirë largimin e Huang. Në tregtimin para hapjes së bursës në Wall Street, aksionet e Nvidia kanë shënuar rënie deri në gati 12%.

Që nga fillimi i skandalit, aksionet e kompanisë kanë humbur mbi 20% të vlerës, duke fshirë pothuajse 1 mijë miliardë dollarë nga kapitalizimi i saj në treg.

Rendit zhvillimet sipas orarit:
Ora 19:09
Pas dorëheqjes së Jensen Huang, Colette Kress merr drejtimin e përkohshëm të Nvidia-s! Kompania nis kërkimet për drejtuesin e ri!

1794510793_po.JPG

Nvidia, kompania që është kthyer në një nga shtyllat kryesore të industrisë globale të inteligjencës artificiale, po kalon një nga krizat më të mëdha në historinë e saj. Largimi i bashkëthemeluesit dhe drejtuesit Jensen Huang ka tronditur tregjet financiare, ndërsa aksionet e kompanisë pësuan rënie të ndjeshme pas njoftimit.

Në këto rrethana, drejtimin e përkohshëm të kompanisë do ta marrë Colette Kress, e cila prej shtatorit të vitit 2013 mban postin e drejtoreshës financiare të Nvidia-s.

Para se t’i bashkohej kompanisë, ajo kishte punuar për afro 25 vite në sektorin financiar të gjigantëve teknologjikë si Microsoft dhe Cisco. Kress do të vijojë të mbajë edhe detyrën e CFO-së, ndërsa bordi drejtues ka nisur kërkimet për një pasues të përhershëm të Huang.

Ndërkohë, bordi drejtues ka nisur procesin për gjetjen e drejtuesit të ri, duke shqyrtuar kandidatë brenda dhe jashtë kompanisë. Kress është shprehur se synon të vijojë punën mbi themelet e ndërtuara gjatë 33 viteve të drejtimit të Jensen Huang.

A.C/Shqiptarja.com

Ora 16:14
Jensen Huang dha dorëheqjen pas 33 vitesh nga drejtimi i gjigantit të inteligjencës artificiale, Elon Musk: Do të ishte nder për mua ta punësoja

1794510725_elonmusk.JPG

Elon Musk është shprehur i gatshëm të punësojë Jensen Huang, pas dorëheqjes së tij nga drejtimi i Nvidia-s, kompani të cilën e bashkëthemeloi dhe e drejtoi për 33 vite. Në një postim në platformën X, blogu financiar ZeroHedge i kërkoi Musk të punësonte 63-vjeçarin, ndërsa miliarderi u përgjigj: “Do të ishte nder për mua”.

Musk dhe Huang kanë një marrëdhënie të gjatë biznesi, pasi Nvidia ka furnizuar Tesla-n me çipa dhe teknologji për projektet e saj. Vetëm muajin e kaluar, Musk kishte vlerësuar publikisht Huang, duke shkruar: “Miqtë e vjetër janë miqtë më të mirë” dhe “Jensen është i jashtëzakonshëm”. Megjithatë, Musk nuk ka bërë të ditur ndonjë ofertë konkrete pune.

A.C/Shqiptarja.com