Një 67- vjeçar shqiptar ka qëlluar 4 herë me pistoletë në drejtim të të dashurit të gruas së tij. Gjykata rajonale e Hildesheim e dënoi dje (27 gusht) 67 vjeçarin me 11 vjet burg për vrasje në tentativë dhe lëndim të rëndë trupor.

Shqiptari Laver C, 67- vjeç kishte krijuar dyshime për gruan e tij 53- vjeçare se e tradhtonte. Ai e monitoroi në mënyrë të vazhdueshme infermieren dhe e shoqëronte edhe nga puna në shtëpi me Mercedesin e tij.

Sipas prokurorisë, shqiptarja besohet se kishte lidhje me bashkatdhetarin Sefat B, 48- vjeç, i cili e njihte infermieren e reanimacionit prej 20 vitesh dhe punonte me të. Megjithëse nuk gjeti prova për të mbështetur dyshimet e tij, Laver C. mori një pistoletë Tokarev, të kalibrit 7.62 mm dhe e qëlloi 48- vjeçarin.

Sipas gjykatës, më 29 janar 2024, Laver C. vëzhgoi 48- vjeçarin dhe priti derisa të kthehej në shtëpi. Kur Sefat B. doli nga makina e tij, Laver C. nxori armën, ndërsa në këtë moment 48 vjeçari tha: “Laver, mos e bëj këtë”.

Por, 67 vjeçari, qëlloi në drejtim të tij, ku njëri plumb e preki në parakrahë, plumbi i dytë në shpinë, i treti në trup, ndërsa i 4-ti i ka lënduar syrin e majtë.

Pak kohë pas sulmit, autori i arratisur u kap nga oficerët e policisë dhe u dërgua në paraburgim. Ai pretendoi se ai dhe djemtë e tij ishin kërcënuar disa herë më parë nga Sefat B.

Sefat B. siguroi se ai nuk kishte pasur lidhje me gruan e tij, ndërsa që nga sulmi me pistoletë ai ka qenë në pushim mjekësor dhe vuan nga ankthi./Bild