Lazarat, 6 arrestime për sulmin
me armë kundër A1Report 

LAZARAT - Nisin arrestimet e para në fshatin e Lazaratit për sulmin e armatosur mesditën e së hënës ndaj gazetarit Gerti Xhaja dhe grupit të xhirimit të televizionit A1 REPORT të cilët ranë pre e pritës së një grupi trafikantësh ndërsa raportonin Live dhe filmonin nga fshati i Lazaratit.
 
Gjashtë  persona, 4 prej tyre pjesë e listës të publikuar nga policia me emrat e 26 anëtarëve të grupit kriminal të udhëhequr nga Gate Mahmutaj, janë arrestuar në flagrancë pasi janë paraqitur në Komisariatin e Policisë së Gjirokastrës dhe kanë dhënë deklarime kontradiktore. 
 
Sipas policisë, në bashkëpunim me persona të tjerë, 6 të arrestuarit dyshohen se janë autorët e sulmit ndaj gazetarëve të televizionit A1 Report, të cilëve u kanë marrë e dëmtuar dhe kamerat, telefonat, laptonin, si dhe të dëmtimit me armë të mjetit të këtij televizioni, mjet i cili më pas është djegur.  
 
Po ashtu ata, janë autorë të dyshuar të sulmit me armë ndaj forcave të policisë në datat 15 dhe 16 qershor, në momentin që këto forca po zhvillonin operacionin policor për identifikimin e sipërfaqeve të kultivuara me bimë narkotike dhe asgjesimin e tyre.

Emrat e personave të arrestuar për sulmin me armë ndaj stafit të A1 REPORT dhe policisë
 
Matjas Muhamet Bocia, vjeç 23, banues në Lazarat Gjirokastër
Florian Nexhip Shurdhi, vjeç 29, banues në Lazarat Gjirokastër
Juxhin Avdul Boci, vjeç  19, banues në Gjirokastër
Xhevahir Miftar Doçi, vjeç 29, banues në Dunavat Gjirokastër
Ali Mato Basha, vjeç 46, banues në Lazarat Gjirokastër
Emiljano Bejko Aliko, vjeç 31, banues në Lazarat Gjirokastër

Gjithashtu rreth orës 08:30 të datës 16.06.2014, në lagjen Pllakë, si pasojë e të shtënave  me armë që vinin nga fshati Lazarat, është dëmtuar nga një plumb rigoshet automjeti në pronësi të shtetasit D.Sh..
 
Materialet procedurale në ngarkim të tyre i kanë kaluar për ndjekje të mëtejshme Prokurorisë së Rrethit Gjyqësor Gjirokastër pa dyshohen se kanë konsumuar veprat penale të “vrasje në rrethana cilësuese e mbetur në tentativë e kryer në bashkëpunim”, “vjedhje”, dhe “shkatërrim prone me zjarr”, parashikuar nga nenet 79/c, 22, 134, 151 dhe 25 të Kodit Penal.

Dje, grupi kriminal i trafikantëve sulm të armatosur grupit të xhirimit të A1 REPORT
Grupi i xhirimit të televizionit A1REPORT ka rënë pre e një terrori me armë nga trafikantët e drogës mesditën e së hënës në Lazarat, teksa hynte për të pasqyruar aksionin antikanabis të policisë.

Breshëri plumbash janë derdhur ndaj makinës me logo, ku gjendeshin gazetari i aktualitetit Gerti Xhaja, operatori Renis Kele, inxhinieri Kreshnik Marku dhe shoferi Hair Ismailonji, mbetur letësisht i plagosur.



Të maskuar me kapuç dhe të armatosur rëndë, trafikantët për 15 minuta kanë mbajtur peng 4 pjestarët e grupit të xhirimit duke i nxjerrë nga makina me tytën e kallashit në kokë, ndërsa kanë shpëtuar fatmirësisht falë ndërhyrjes së një banori të zonës i cili u përball me trafikantët dhe mori në makinën e tij grupin e redaksisë së A1 Report duke i çuar pranë forcave RENEA në hyrje të fshatit… Pas këtij momenti banorët e Lazaratit kanë njoftuar gazetarin Gerti Xhaja se makina me logon e televizionit A1 REPORT ishte djegur dhe shkatërruar plotësisht nga trafikantët.



​Në pamjet e xhiruara nga një gazetare e Top Channel, e cila u gjend në zonë pak minuta më vonë, duket makina e bërë shosh nga plumbat dhe më pas e djegur nga trafikantët e maskuar dhe të armatosur. Fatmirësisht 4 pjestarët e grupit të xhirimit janë mirë, përpos disa lëndimeve të lehta nga thyerja e xhamave. 



Kjo foto dëshmon djegien e makinës dhe se sa i madh ka qenë sulmi dhe breshërinë e automatikut ndaj makinës së televizionit A1 REPORT. Foto të tjera

Grupi i televizionit A1 REPORT ndodhej në Lazarat për të raportuar dhe për të sjellë pranë publikut ndërhyrjen e Policisë në këtë zonë në kuadër të aksionit Antikanabis ndërsa kanë hasur në rezistencën e armatosur të një grupi kriminal prej 26 personash, sipas policisë të udhëhequr nga Rezip Mahmutaj. 

Polcia e Shtetit në komunkatën e mbrëmjes së të hënës për aksionin e policisë në Lazarat bën të ditur se kanë nisur hetimet lidhur me incidentin e rëndë në Lazarat, ku u sulmua ekipi i televizionit A1 REPORT.
.......

Si u sulmua gazetari Gerti Xhaja dhe grupi i xhirimit te televizionit A1 REPORT
Gazetari Gerti Xhaja i cili ndërrmori këtë mision të vështirë mediatik, tregoi nga vendngjarja se ai bashkë me grupin e xhirimit kanë shpëtuar falë ndërhyrjes së një banori të fshatit që largoi kriminelët.
 
Nën ngarkesën emocionale, pasojë e këtij sulmi që për vetë të duket i pashpjegueshëm për mënyrën se si rrodhi, gazetari Xhaja tregon se makina e televizonit është qëlluar nga mbrapa ndërkohë që ishte në ecje duke xhiruar plane nga fshati i Lazaratit. Për të mos shkuar më në thëllësi të fshatit dhe për të mos ngjallur “revoltën” e trafikantëve, grupi i xhirimit të A1 REPORT ka ndalur makinën. Më tej disa persona të maskuar dhe të armatosur kanë goditur me tyta duke thyer xhamin dhe duke marrë kamerën me të cilën po xhironte operatori. “Në këtë moment kemi qenë në lidhje live. Kam parë dy persona që vinin nga pas, ndërkohë që vinte dhe një i tretë. Personat na nxorrën me tytën e kallashit në kokë dhe për disa moment na mbajtën pas automjetit. Në momentin e parë na është afruar një person, dhe brenda pak minutave kemi parë 3 persona dhe në momentin që po ndërronin karrikatorin kanë ndërhyrë banorët që kanë shpëtuar”, rrëfeu gazetari Gerti Xhaja nga Lazarati pas sulmit të bërë ndaj A1 Report.



Banori i Lazaratit shpetoi gazetarin dhe grupin e xhirimit te A1 REPORT rezulton në listën e policisë mes 26 trafikantëve të shpallur në kërkim

Pasi i premtoi se do t’i ndihmonte, personi në fjalë, emri i të cilit figuron mes 26 trafikantëve në listën e publikuar nga policia, ka marrë gazetarin Gerti Xhaja dhe operatorin dhe i ka lëvizur me makinën e tij pak metra larg makinës me logo të televizionit A1 REPORT, por gazetari Xhaja i ka kërkuar ndihmë për të shpëtuar edhe shoferin dhe teknikun e televizionit A1 REPORT të cilët ndodheshin ende në makinë. Personi është kthyer sërish pranë makinës së televizionit dhe ka marrë shoferin e A1 REPORT i cili ishte totalisht i gjakosur në fytyrë pasi kishte marrë dëmtime nga xhamat e thyer nga armët e trafikantëve. Tekniku i televizonit ishte larguar nga makina dhe pas pak momentesh 4 pjestarët e A1 REPORT janë bërë bashkë në makinën e banorit të Lazaratit që i ndihmoi, i cili i çoi në hyrje të fshatit pranë forcave RENEA dhe policisë dhe është larguar pasi nuk donte të përfshihej në këtë ngjarje. 

Pas sulmit me arme trafikantet dogjen makinen me logo te televizionit A1 REPORT
“Pas sulmit që na u bë jemi ulur në një lokal përballë rrugicës që të çon në Lazarat dhe aty ndiqnim tymin që lëshohej nga makina. Më pas mësova se emri i personit që na shpëtoi rezultonte në emrat më të rrezikshëm që kërkohej nga polici, por ai na shpëtoi nga ata njerëz që na rrezikuan jetën”, tha gazetari Gerti Xhaja në lidhjet e vazhdueshme telefonike që ka pasur për A1 REPORT në lidhje me këtë sulm të rëndë të trafikantëve ndaj një grupi mediatik.
 

(Në video: Makina e televizionit A1Report duke u djegur pas sulmit nga kriminelët në Lazarat) Foto të tjera



Gazetarja Fidhi:Grupi i A1 Report u sulmuan nga 20 kriminelë të armatosur
Gazatarja e Top-Channel Kristina Fidhi, e cila ka qenë një nga dëshmitaret e sulmit ndaj grupit të televizionit të A1 Report, tregoi ngjarjen se si kishte ndodhur sulmi ndaj gazetarëve. Gazetarja Fidhi  tha se grupi i xhirimit të A1 Report është ndodhur mes shkëmbimit të zjarrit ndërmjet kriminelëve dhe policisë. Sipas gazetares, kriminelët kanë pikasur makinën e A1 Report të cilët i janë sulur menjëherë me të shtëna armësh.

Fidhi sqaroi se ka qenë ndërhyrja e një prej banorëve që iu është përgjigjur me armë zjarri që ka shpëtuar grupin e A1 Report nga sulmi i kriminelëve.

"Në momentin që gazetarët e A1 Report kanë hyrë në Lazarat, ka qenë momenti i shkëmbimit të zjarrit me policinë. Në atë moment pamë 20 persona që sapo pikasën mjetin iu sulën makinës. Ata e panë që ishte media megjithatë qëlluan. Ka qenë një banor i fshatit ka hyrë në mes të plumbave dhe ka qëlluar mbrapsh ndaj tyre duke u shpëtuar atyre jetën. Më pas ata janë shtyrë dhe janë dëbuar nga kriminelët, dhe në dalje të fshatit kemi parë mjetin e përflakur. Kemi dëgjuar thirrje sepse të shtënat e armëve kanë qenë të mëdha, të gjithë u shtrinë përdhe përfshirë edhe ne. Në atë moment pamë që disa nga plumbat kishin përfshirë edhe mjetin. Më shumë dëgjuam komentet e njerëzve që thonin se ishin gazetarë dhe që ishin dëbuar nga kriminelët." tha Kristina Fidhi

(Video, Gazetarja Fidhi:Grupi i A1 Report u sulmuan nga 20 kriminelë të armatosur)


 
Njoftimi i Policisë së Shtetit për sulmin ndaj gazetarit te A1 REPORT, nisin hetimet
Gjatë kohës që strukturat e policisë kanë ndërhyrë për vënien nën kontroll të këtyre objekteve dhe kapjen e personave, që qëlluan me armë policinë, është sulmuar grupi i televizionit A1 Report, nga persona akoma të paidentifikuar. Si pasojë e këtij sulmi ka mbetur i lënduar nga xhamat drejtuesi i mjetit të këtij televizioni, i cili pas marrjes së mjekimit të nevojshëm dhe kryerjes së veprimeve procedurale është larguar nga spitali dhe ndodhet jashtë rrezikut për jetën. Ndërkohë nga sulmi është djegur plotësisht dhe mjeti i këtij televizioni. Strukturat e Policisë së Shtetit kanë kryer veprimet procedurale për rastin në fjalë. Materialet edhe për këtë rast do ti referohen Prokurorisë.

(Raportimi i parë telefonik live i gazetarit Gerti Xhaja pak minuta pas ngjarjes)

TAG:
• lazarat