“ATSH” me godinë të re me
kushte komode dhe moderne

TIRANE- Godina që prej vitit 1979 godinë është identifikuar nga qytetarët si Agjencia Telegrafike Shqiptare, tashmë do t'i shërbejë Ministrisë së Mjedisit dhe Inspektoratit të Mjedisit.

Kështu që, ky fillim jave i ka gjetur një pjesë të punonjësve të “ATSH” në një godinë të re, e pozicionuar mbrapa Radiotelevizionit Shqiptar. Ndonëse ambientet e reja janë ende në proces mobilimi duket qartë se ato ofrojnë kushte komode dhe moderne.

Kamera e “A1 Report”, ka vizituar edhe godinën e vjetër të “ATSH”, ku ajo çka tërheq vëmendjen është heshtja dhe ambientet e boshatisura.
 
Në ish-ambientet e Agjencisë kemi gjetur drejtorin e Multimedias, Ylli Patën, i cili na shpjegoi se “ATSH” nuk do të ketë vetëm një godinë të re, por edhe një koncept të ri që tashmë ka nisur të zbatohet që me ardhjen e qeverisë Rama.

“Prej një viti kemi një koncept që të jemi një agjenci publike ku të japim të gjithë zërat e shoqërisë dhe një hapësirë shumë të rëndësishme për vetë qeverisë e cila normalisht prodhon më shumë lajme por është dhe opozita ka hapësirën e vetë”, tha Ylli Pata.
 
Çdo pjesë e këtij institucioni që mund të quhet ndryshe shkollë për qindra gazetarë, përkthyes, fotoreporterë, dhe teknikë ka një histori më vete sipas dekadave të ndryshme.
 
Para viteve ‘79 kjo godinë shërbente si agjencia kineze e lajmeve, por prishja e marrëdhënieve me Kinën bëri që godina të ishte në funksion të “ATSH”.
 
Deri para viteve ’90 ishte si një bunker, ruhej nga të gjitha cepat me policë të armatosur. Në disa salla nuk lejohej të hynin as gazetarët, por vetëm persona të autorizuar.

Sot, “ATSH” nuk do të jetë më në këtë godine.
 
Zhvendosja, nuk ka qenë e thjeshtë sidomos për punonjësit e vjetër të cilët për të ruajtur nostalgjinë për këtë vend, kanë marrë edhe simbole prej tij. Një copë gur i ka mjaftuar Arjan Jorgaqit, shefit të lajmeve nga bota, si kujtim nga ish-vendi i tij i punës.
 
Redaksia Online
(e.s/shqiptarja.com)