“Habilaj” Italia sjell prova të reja
gazetari Rusta:Gati 12 arrestime

Report Tv zbulon se pasditen e sotme në Prokurorinë e Krimeve të Rënda ka mbërritur nga pala italiane një tjetër fashikull me 380 faqe që vlen për palën shqiptare në hetimet e nisura për Saimir Tahirin në dosjen e Habilajve.

Lajmi është konfirmuar nga gazetari i Report Tv Arsen Rusta në emisionin ‘Repolitix’ në Report Tv mbrëmjen e sotme. Pala italiane i është përgjigjur palës shqiptare për ndihmë juridike në procesin që ka nisur në Shqipëri.

Burimet pohojnë se përmbajtja e 380 faqeve që ka mbërritur sot është e vlefshme edhe për përballjen e ditës së nesërme në Këshillin e Mandateve ku do të vendoset fati i imunitetit të Tahirit. 

Materiali voluminoz prej 380 faqesh është përkthyer nga gjuha italiane dhe ka marrë vulat duke u vendosur në dispozicion të grupit të prokurorëve së bashku me 416 faqet e para që u sollën pak ditë më parë.

Gjithashtu gazetari Rusta ka deklaruar se sipas burimeve të tij prokuroria ka firmosur urdhër arrestin për 12 zyrtarë të shtetit, që janë përmendur nga përgjimet italiane dhe zyrtarë aktualë në policinë e Vlorës.

“Masat e sigurisë për 12 zyrtarë të shtetit janë firmosur. Janë emra të përmendur në fashikullin e dosjes Italiane, nga hetimi prej 2016 dhe zyrtarë aktualë të policisë së Vlorës që janë faktuar si ndihmues të trafikantëve te dosja Habilaj” deklaroi Rusta. 

Përsa i përket kërkesës së prokurorisë, Rusta u shpreh i bindur se organi i Akuzës do të kërkojë që të vlerësohet një masë për ish-ministrin, por nuk do ta arrestojë. 

 

dy.b/shqiptarja.com