“Proto Thema”: Spahiu,
ekstremisti që tronditi Athinën

GREQI - “Ekstremisti i djathtë që tronditi Athinën”. Ky është artikulli i gazetës greke “Proto Thema” për kreun e Aleancës Kuq e Zi, Kreshnik Spahiu, të cilin e krahason me përfaqësuesit e partisë neonaziste greke “Agimi i Artë”.

Sipas artikullit të kësaj gazete, Kreshnik Spahiu ka “sindromën antigreke” dhe në favor të saj përdor shkëlqyeshëm populizmin dhe demagogjinë.

“Orator i mirë, 43-vjeçari tashmë me stil sportiv, arrin të ngrejë peshë publikun që sheh në profilin e tij, udhëheqësin që do të mbyllë në burg politikanët e korruptuar të vendit dhe do bëjë realitet Shqipërinë e Madhe”, shkruhet në gazetën "Proto Thema".

Gazetari Panajoti Savidi vijon shkrimin e tij duke theksuar se “në rastin e Keshnik Spahiut shkon për shtat thënia e Cezarit “Edhe ti Brut?”, për shkak se ai ka qenë i preferuari i Berishës dhe më pas u kthye në kundërshtar fanatik të tij”.

Shkrimi vijon duke theksuar se kreu i AK-së, Kreshnik Spahiu ëndërron “Kufij deri në Kostur dhe në Prevezë”. Sipas gazetës, reagimi i ministrisë së Jashtme greke nuk ka qenë i duhuri as për ngjarjet e Këlcyrës dhe as për incidentet e vazhdueshme antigreke në Shqipëri.

Ky qëndrim sipas gazetes ka nxitur Spahiun të demonstrojë forcën edhe brenda në Greqi, duke iu referuar kështu një tubimi të paralajmëruar në Athinë, për të cilin policia greke nuk dha leje dhe nuk garantoi sigurinë e saj.

(eç/shqiptarja.com)