“Rivalët” për Elbasanin Turku
e Sejdini, bashkë për ligjin e ri

TIRANE - Kryebashkiaku aktual Qazim Sejdini dhe deputeti i PD-së Ardian Turku pritet të propozohen si kandidatë për Bashkinë e Elbasanit nga mazhoranca dhe opozita në zgjedhjet e 21 qershorit. Dy forcat politike janë duke vlerësuar rezultatet e fundit që dalin për këto emra për të bërë më pas edhe lançimin e tyre për një nga bashkitë më të rëndësishme në vend.

Megjithëse brenda pak muajsh mund të përballen me njëri-tjetrin në zgjedhjet vendore, Sejdini e Turku nuk janë ndikuar nga gara për të diskutuar së bashku ndryshimet në ligjin për pushtetin lokal. Në takimin e zhvilluar dje nga Shoqata për Autonomi Vendore me mbështetjen e Këshillit të Europës krahas kryebashkiakut Sejdini dhe drejtuesve të komunave në këtë qark, ka qenë prezent edhe deputeti i PD dhe kandidati i mundshëm i opozitës Ardian Turku.