Leksioni i fortë i Gertës

Qëllon që në ritmin e ditëve, edhe në redaksi,  të mos kemi në fokus të plotë të gjitha lajmet më të rëndësishme. Por, mekanizmat e teknologjisë na zgjojnë e na thonë: Ky është lajmi më i pëlqyer, më i lexuar dhe më i shpërndarë te Shqiptarja.com.
 
Pasditen e së shtunës, fjalimi i bërë në Kuvendin e Shqipërisë nga fermerja e diplomuar në La Sapienza, Gerta Loku Tushaj, kishte lënë "pa fjalë" shumë vetë. Duke e dëgjuar dhe ridëgjuar ndjeva se si nuk kishte si të mos kalonin nga zemra në zemër ato fjalë. Ishin fjalë të vërteta, të ndjera, të thëna nga Periferia për Qendrën, që prej kohësh ka humbur ndjeshmërinë ndaj realiteteve më të largëta.
 
Ndërsa Gerta, e laureuar dhe specializuar në Itali, fliste për realitetin e bukur të fermës së saj me keca e dhi, e përlotej me sinqeritet për gjendjen e fshatit e  të fshatarëve të zonës së Mirditës, fjalët e saj hynin thellë e më thellë mes të pranishmëve e kujtdo që në video apo në media e ka dëgjuar e lexuar. E dëgjoja e ridëgjoja, duke  reflektuar se fjalët e saj të vërteta e gjenuine ndriçonin plastikën që përditë e më shumë po ngrin zemrat e Qendrës.  Nëse vërtetë fjalët e Gertës tek ne kanë zënë rrënjë, ndoshta  jemi ende të kohë të zbulojmë vetveten, të kuptojmë se ku po shkojmë, e të shpëtojmë.
 
Nuk është hera e parë që shqiptarët si lexues e dëgjues preferojnë fjalime të tilla. Disa herë na ka surprizuar etja e madhe për t'ja vënë veshin njerëzve të punës, më shumë se atyre të fjalës; shembujt e mirë, të treguar me vërtetësi e thjeshtësi arrijnë më kollaj te njerëzit e shpërndahen në rrjete sociale e në media me shpejtësinë e erës.
 
Ky është leksioni i thjeshtë dhe i fortë i Gertës. Vajza punëtore, e ditur e Periferisë, që këtë fundjavë zgjoi Qenrdën.