POP 5

Lajmet më të lexuara të 5 minutave të fundit

Politikë

Lezhë, 300 të djathtë e ish-të
përndjekur i bashkohen Ramës

Gjatë një takimi të zhvilluar në qytetin e Lezhës, i shoqëruar edhe nga deputetja Mimi Kodheli, si dhe drejtues të PS-së në këtë qark, kryesocialisti ka bashkëbiseduar me një grup prej rreth 300 përfaqësuesish të së djathtës dhe ish-të përndjekurve politikë.
Lezhë, 300 të djathtë e ish-të <br />përndjekur i bashkohen Ramës
LEZHE - Kryetari i Partisë Socialiste, Edi Rama ka marrë mbështetje nga përfaqësues të së djathtës në qarkun e Lezhës, të cilët janë shprehur të zhgënjyer nga politika 22-vjeçare dhe veçanërisht nga qeverisja e PD-së. Gjatë një takimi të zhvilluar në qytetin e Lezhës, i shoqëruar edhe nga deputetja Mimi Kodheli, si dhe drejtues të PS-së në këtë qark, kryesocialisti ka bashkëbiseduar me një grup prej rreth 300 përfaqësuesish të së djathtës dhe ish-të përndjekurve politikë. Këta të fundit e kanë njohur kreun e PS me zhgënjimin e tyre nga trajtimi që u është bërë në këto vite nga qeverisja e PD-së, të cilës i kanë dhënë votën, por prej të cilës, shprehen se nuk kanë marrë as mirënjohjen më minimale.

Ndue Bajraktari, në familjen e të cilit numërohen 16 persona të vrarë e të burgosur politikë dhe familja e të cilit prej 20 vjetësh ka votuar për PD, në fjalën e tij tha: “Edi Rama do të ndihmojë për të bërë shtetin. Kësaj herë shteti ka përfunduar, qysh se edhe ne të persekutuarit na ka lënë në këtë gjendje. Unë jam një i persekutuar që kam në familje 16 persona të persekutuar, prej të cilëve 9 vetë të pushkatuar dhe 7 të burgosur politikë, me 184 vjet burg. Kemi marrë vetëm një këst nga dëmshpërblimi, 11 milionë lekë për axhën që më kishte bërë 34 vjet burg rresht në burgjet komuniste. Dhe kryeministri thotë se kemi marrë këstin e dytë e të tretë. Po unë kam në familje edhe 15 vetë pa filluar të marrin dëmshpërblimet. Atëherë, sipas llogarisë, për 20 vjet një këst, atëherë vetëm axha im do 114 vjet që ta marrë dëmshpërblimin. Si ka mundësi të gënjejë kaq hapur një kryetar shteti?!”, e ka shfryrë dufin e tij i moshuari, i cili u ka bërë thirrje të gjithë të persekutuarve të votojnë projektin e PS për një Rilindje Shqiptare.

Pas tij ka folur Marash Vata, që vjen nga një tjetër familje me tradita dhe me prejardhje të djathtë. “Kemi votuar për PD-në çdo herë, sepse menduam që PD do ishte partia e të ardhmes së Shqipërisë, përparimit të Shqipërisë, për të prurë demokracinë në këtë vend. Na zhgënjeu totalisht. Në ’90 ne menduam se e rrëzuam diktaturën komuniste, rrëzuam diktatorin Enver Hoxha, por gjatë këtyre viteve kemi një diktator më të egër se Enver Hoxha. Është një diktator më i egër komunist që ka mbetur sot në Europë pas Sllobodan Milosheviçit. Sot bashkë me shtresën e të persekutuarve jemi grumbulluar si në ’90 kur kemi dashur të rrëzojmë diktaturën. Jemi grumbulluar të gjithë të persekutuarit, të djathtët, shqiptarët që e duan kombin, e duan atdheun e duan flamurin për të rrëzuar me votën e lirë dhe demokratike, diktatorin e fundit komunist, Sali Berishën”, ka thënë Marash Vata.

Nga ana e tij kreu i Partisë Socialiste është shprehur se vendi ndodhet në një situatë shumë të vështirë ndaj nuk ka vend për ndarje të mëtejshme majtas apo djathtas. Sipas tij vendi i çdo shqiptari që dëshiron ndryshimin është përballë Saliut dhe partisë së tij familjare që duhet të largohet me votë për t’i hapur rrugë Rilindjes së vendit.

“Llogore në çdo fshat, i majtë, i djathtë. Për çfarë ndarje i majtë - i djathtë flasim. Pa drita si i majti, si i djathti, pa ujë si i majti si i djathti, pa ujë si i majti si i djathti, të dy në kafe sherr me njëri-tjetrin dhe Saliu në Tiranë vazhdon të pasurohet. Nuk ka vend sot për majtas e djathtas, e për në mes e anash. Sot ka vetëm një vend për çdo shqiptar që dëshiron të shohë ndryshimin; Ballë për ballë me Saliun dhe me këtë parti familjare që duhet të largohet në 23 qershor në mënyrë që të rilindë edhe Partia Demokratike”, është shprehur kryetari i Partisë Socialiste, Edi Rama.

Redaksia Online
(Gre.M/Shqiptarja.com)

  • Sondazhi i ditës:
    26 Nëntor, 23:23

    A po japin rezultat protestat e PD-së?

Lajme të tjera



×

Lajmi i fundit

Namir Lapardhaja: Flojera Davidhi – gjyqtare e ‘fjalës së lirë’ apo ‘e kapur nga Edi Rama’?

Namir Lapardhaja: Flojera Davidhi – gjyqtare e ‘fjalës së lirë’ apo ‘e kapur nga Edi Rama’?

27 Nëntor, 11:22 nga Namir Lapardhaja