Liderët e Preshevës, letër qeverisë
shqiptare para mbledhjes në Prizren

PRESHEVË - Liderët shqiptarë nga Kosova Lindore pak ditë para mbledhjes së dy qeverive asaj të Tiranës dhe Prishtinës i kanë dërguar një letër qeverisë shqiptare mbi Luginën e Preshevës.

Siç transmeton agjencia e lajmeve “Presheva jonë” me qendër në Zvicër, letra i është dërguar Ministrisë së Punëve të Jashtme të Republikës së Shqipërisë dhe aty janë paraqitur disa rekomandime mbi gjendjen e shqiptarëve në Luginën e Preshevë dhe përfshirja e kësaj çështjeje në bisedimet dypalëshe.

Në këtë letër fillimisht përshkruhet situata e rëndë politike dhe ekonomike në Luginën e Preshevës, e cila mori hov sidomos pas largimit të lapidarit të UÇPMB-së dhe si pasojë e politikave diskriminuese nga qeveria serbe.

Më pas janë paraqitur një sërë rekomandimesh, ku kërkohet ndihmë nga Tirana zyrtare, për të tejkaluar këtë situatë me qëllim përparimin e proceseve në Luginën e Preshevës në favor të paqes dhe stabilitetit në rajon.

Një ndër kërkesat elementare të përfaqësuesve nga Lugina e Prshevës, drejtuar qeverisë shqiptare, janë edhe mbështetja e qeverisë shqiptare në sferën e arsimit, shëndetësisë, kulturës, zhvillimit ekonomik dhe informimit, ndërkohë që sot në Luginë disa media mbështeten dhe financohen nga qeveria serbe.

“Gjendja aktuale në tri komunat shqiptare në këtë pjesë të Serbisë mbetet edhe më tej e vështirë si ekonomikisht, ashtu edhe politikisht, situatë kjo e cila është reflektuart negativisht edhe në zbrazjen e Luginës, sidomos nga të rinjtë, të cilët largohen në vendet perendimore, kryesisht në vendet anëtare të BE-së.

Liderët politikë të Bujanocit dhe Preshevës kërkojnë nga autoritetet shqiptare, që në kuadër të bashkëpunimit rajonal të mbështesin zhvillimet dhe proceset në Luginën e Preshevës në bashkëpunim me institucionet ndërkombëtare dhe ato rajonale (OKB, OSBE, KE, Parlamentin Europian etj).

Kjo me qëllim zbutjen e papunësisë në këtë rajon, i cili konsiderohet më diskriminuari dhe më i varfri në këtë pjesë të Evropës.

Redaksia Online
(mag/shqiptarja.com)

TAG:
• OSBE