Lideri indigjen Metuktire në Europë për zjarret në Amazon (VIDEO)

Alarmi i Amazonës dhe problemet që lidhen me shpyllëzimin e mushkërive të gjelbërta të planetit Tokë, mbërritën deri në Biarritz përmes udhëheqësit indigjenë Raoni Metuktire.

Në samitin e G7-ës ai sensibilizoi edhe më shumë liderët e vendeve më të industrializuara të globit, të cilët vendosën të akordonin dhjetëra miliona dollarë për pyjet e shiut të Amazonës.

Për Metuktire, Presidenti Bolsonaro është përgjegjësi i vetëm për situatën e krijuar.

"Ne besojmë se pozicioni i presidentit Bolsonaro ka forcuar pozicionin e atyre që vendosin zjarre për arsye bujqësore. Asnjëherë nuk ka ndodhur në të kaluarën që një president të ketë bërë një gjë të tillë"- tha Raoni Metuktire

Lideri indigjen ka kërkuar që Amazona të shpëtohet nga zjarret sepse është një nga rajonet që na lejon të marrim frymë kurse Presidenti francez ka premtuar një plan prej të paktën 20 milion dollarë dhe i ka bërë problematikat e klimës, një nga temat më e rëndësishmja e axhendës botërore.

Udhëheqësi i indigjenëve brazilianë Raoni Metuktire është lideri i popullit Kayapó dhe mbrojtësi i madh i Amazonës.

Pas vizitës në Biarritz, ai do të zhvillojë një turne tre javor nëpër Europë me qëllim sensibilizimin për shpyllëzimet në Amazon dhe do përpiqet të mbledhë fonde për mbrojtjen e rezervave natyrore të Mato Grosso.

Lideri indigjen, pas vizitës në Paris, do të vizitojë Belgjikën, Luksemburgun, Monakon dhe Italinë, ku do të takohet me Papa Françeskun.

Turneu i këtij viti është më i rëndësishëm se ata të mëparshmit, po të kemi parasysh pozicionin aspak ekologjik të Presidentit brazilian Bolsonaro.

/r.k./Shqiptarja.com

TAG:
• itali
• macron
• belgjike
• G7
• Amazon
• Bolsonaro
• Raoni Metuktire
• Luksemburg