Ligji i ri, ja si do llogariten pikët për
familjet që kërkojnë banesa sociale 

Familjet që do përfitojnë banesa sociale do përzgjidhen përmes një sistemi pikësh, ku do merren parasysh një seri elementesh, nga zotërimi apo jo i një shtëpie, kushtet familjare, rreziqet e shembjes, apo numri i fëmijëve.

Ministria e Zhvillimit Urban ka hedhur për konsultim publik draftin e parë të projektligjit "Për Programet Sociale të Strehimit". Sistemi i pikëve do vlerësojë me më shumë pikë familjet që nuk disponojnë banesë në pronësi; që banojnë në ndërtesa që paraqesin rrezik shembjeje; që banojnë në banesa të mbipopulluara.

Vlersim të lartë me pikë do marrin dhe familjet që kanë mbetur ose rrezikojnë të mbeten të pastreha, si rezultat i fatkeqësive natyrore ose zbatimit të një vendimi gjyqësor.
Pikëzimi do vlerësojë dhe kushtet familjare.

Më shumë përparësi do kenë familjet një prindërore, që kanë në ngarkim fëmijë; të moshuarit, që kanë mbushur moshën e pensionit dhe që nuk përzgjidhen për t'u strehuar në institucionet publike të përkujdesjes shoqërore; familjet me më shumë se katër fëmijë;çiftet e reja me moshë totale deri në 60 vjeç.
 
Kushtet sociale, në bazë të të cilave përcaktohen me përparësi rastet e mëposhtme: personat me aftësi të kufizuara; personat me statusin e jetimit, që nga çasti i daljes nga qendrat e përkujdesjes shoqërore e deri në moshën 30 vjeç; emigranti i rikthyer, punëtor emigrant; familjet e policëve të rënë në detyrë; viktimat e dhunës në familje; viktimat e trafikimit; si dhe komuniteti Rom. 

Redaksia Online 
XH.K/shqiptarja.com