Lista e barnave me rimbursim
shtohen 26 medikamente

TIRANE- Për vitin 2012 listës së barnave që përfitohen me rimbursim do i shtohen plot 26 medikamente të reja. Lista e re është firmosur nga ministria e Shëndetësisë dhe pritet të miratohet gjatë kësaj jave edhe në Institutin e Sigurimeve të Kujdesit Shëndetësor dhe më pas në Këshillin e Ministrave, ku do të marrë edhe formën ligjore. Lista e barnave me rimbursim, që është fuqi, u miratua në muajin qershor të vitit të kaluar. Ajo ka 420 barna dhe fondi i akorduar për të ishte plot 6.9 miliardë lekë, por kjo listë një vit më parë u shtua me vetëm 11 medikamente të reja. Ndërsa shtimi i 26 barnave të reja bënë që fondi i këtij viti të jetë 8.3 miliardë lekë. 26 barnat e reja i përkasin sëmundjeve si hipertensioni, dializa, diabeti, si dhe një citostatikë mjaft i shtrenjtë, por më efikas për ata që janë të prekur nga leucemia. Nga skema e sigurimeve shëndetësore, përfitojnë rimbursim 100 % pensionistët, veteranët, invalidët e plotë të punës, invalidët e luftës, të sëmurët me CA, me TBC, fëmijët 0-12 muaj, si dhe jetimët. Këtë vit janë miratuar 26 barna të reja, gati dyfishi i risive të çdo vit.
(sg/shqiptarja.com)